গাৰ ওপৰতে বিদ্যুত পৰিবাহী তাঁৰ চিঙি পৰাত এজন কৃষকৰ শোকাৱহ মৃত্যু

কাজিৰঙাৰ গেলেকীৰ গোঁসানীবৰত আজি পুৱা এক শোকাৱহ ঘটনা সংঘটিত হয়৷ নিজৰ কৃষি ভূমিত কাম কৰি থকা অৱস্থাত গাৰ ওপৰতে এডাল উচ্চ ক্ষমতা সম্পন্ন বিদ্যুৎ পৰিবাহী তাঁৰ পৰা বাবে থিতাতে নিহত হয় চুটুবাবু চাওতাল নামৰ এজন কৃষক।

বিদ্যুত পৰিবাহী তাঁৰ চিঙি কৃষকৰ মৃত্যুৰ এই ঘটনাৰ বাবে বিদ্যুত বিভাগৰ বিৰুদ্ধে ক্ষোভিত হৈ পৰিছে স্থানীয় জনসাধাৰণ৷

স্থানীয় লোকৰ মতে বিদ্যুত বিভাগৰ হেমাহিৰ বাবেই এই শোকাৱহ ঘটনাটো সংঘটিত হ’বলৈ পায়৷ স্থানীয় লোকৰ মতে অঞ্চলটোত থকা বিদ্যুত পৰিবাহী তাঁৰ আৰু খুটাৰ অৱস্থা তথৈবচ৷

অঞ্চলটোত ভয়াবহ অৱস্থাত থকা এই তাঁৰবোৰ পৰিদৰ্শন কৰি মেৰামতি কৰিবলৈ বিদ্যুৎ বিভাগৰ কৰ্মচাৰী কোনো দিনেই নাহে৷

বাঁহৰ জেং, গছৰ ডাল আদি বিদ্যুত পৰিবাহী তাঁৰত লাগি ভয়াবহ হৈ থকাৰ পাছতো এইবোৰ পৰিস্কাৰ কৰাৰ ব্যৱস্থা আজি লৈকে গ্ৰহণ  নকৰিলে বিদ্যুত বিভাগে৷

যাৰ পৰিণতিতেই আজিৰ এই শোকাৱহ ঘটনাটো সংঘটিত হ’ল বুলি স্থানীয় লোকে অভিযোগ কৰাৰ লগতে নিহত চুটুবাবু চাওতালৰ পৰিয়ালক উচিত ক্ষতিপূৰণ দিবৰ বাবে দাবী জনাইছে৷