ক’ৰ’না ভাইৰাছৰ আতংক; পৰ্যটকৰ বাবে বন্ধ কৰা হ’ব কাজিৰঙা!

বিশ্ব প্ৰায় ১০০খনৰো অধিক দেশত মহাৰাহী ৰূপ ধাৰণ কৰা ক’ৰ’না ভাইৰাছৰ আতংকই চুই গৈছে কাজিৰঙা।

ক’ৰ’না ভাইৰাছৰ বাবেই কাজিৰঙা ৰাষ্ট্ৰীয় উদ্যানত দেশী-বিদেশী সকলো পৰ্যটকৰ প্ৰৱেশ কিছুদিনৰ বাবে বন্ধ কৰা হ’ব পাৰে! এই সম্ভাৱনা ব্যক্ত কৰিছে উদ্যানখনৰ সঞ্চালক পি শিৱকুমাৰে।

ক’ৰ’নাত আক্ৰান্ত পৰ্যটকৰ পৰা কাজিৰঙাৰ বন্যপ্ৰাণীলৈ ক’ৰ’না ভাইৰাছ সংক্ৰমণ হ’ব পাৰে বুলি আশংকা কৰি এই সিদ্ধান্ত লোৱা হ’ব পাৰে বুলি জানিব পৰা গৈছে।

উল্লেখ্য যে কিছুদিন পূৰ্বে কাজিৰঙাৰ পৰা ভূটানলৈ যোৱা এগৰাকী মাৰ্কিন পৰ্যটকৰ শৰীৰত ক’ৰ’না ভাইৰাছৰ বীজাণুৰ উপস্থিতি ধৰা পৰিছিল।

ইফালে কেন্দ্ৰীয় চৰকাৰে চীন, ইটালী, জাৰ্মানী, ফ্ৰান্স, কোৰিয়া, স্পেইনকে ধৰি বিশ্বৰ সাতখন দেশৰ পৰ্যটকৰ বাবে ৰাষ্ট্ৰীয় উদ্যানখনত নিষেধাজ্ঞা জাৰি কৰিছে বুলি বোকাখাটৰ মহকুমাধিপতিয়ে জানিবলৈ দিছে।

আনহাতে বিদেশী পৰ্যটকৰ বাবে পৰ্যটক নিৱাসৰগৰাকীয়ে কোঠা খালী থকাৰ পিছতো কোঠা দিয়াৰপৰা  বিৰত আছে বুলি জানিব পৰা গৈছে।

ক’ৰ’নাত আক্ৰান্ত মাৰ্কিন পৰ্যটকগৰাকীক পৰিভ্ৰমণ কৰোৱা জীপ ছাফাৰী চালকজনক বিশেষভাৱে স্বাস্থ্য পৰীক্ষা কৰোৱা হৈছে।

বিগত কিছুদিনৰ পৰা কাজিৰঙাত পৰ্যটকৰ সংখ্যা ক্ৰমাগতভাৱে হ্ৰাস পোৱাও দেখা গৈছে।