বাংগালুৰুত যুৱতীক দলবদ্ধ ধৰ্ষণ অনলাইন বাইক সেৱা চালকৰ: অভিযুক্তক গ্ৰেপ্তাৰ
দেশত উদ্বেগজনক হাৰত ধৰ্ষণৰ ঘটনা বৃদ্ধি হোৱাৰ সময়তে পোহৰলৈ অহা যোৱা শুকুৰবাৰে বাংগালুৰুত সংঘটিত আন এক দলবদ্ধ ধৰ্ষণ কাণ্ডই চাঞ্চল্যৰ সৃষ্টি কৰিছে।
শুকুৰবাৰে নিশা অনলাইন বাইক সেৱাৰ সুবিধা গ্ৰহণ কৰিবলৈ গৈ বাইক চালক আৰু তেওঁৰ বন্ধুৰ দ্বাৰা ধৰ্ষিতা হোৱাৰ অভিযোগ উত্থাপন কৰিছে এগৰাকী ২২ বছৰীয়া যুৱতীয়ে।
কেৰালাৰ পৰা বাংগালুৰুলৈ অহা যুৱতীগৰাকীয়ে শুকুৰবাৰে প্ৰায় মাজনিশা তেওঁৰ বন্ধুৰ ঘৰলৈ যোৱাৰ লক্ষ্যৰে অনলাইন বাইক বুকিং কৰিছিল। আৰক্ষীয়ে জানিবলৈ দিয়া মতে, মহিলাগৰাকীয়ে বাইক বুকিং কৰাৰ সময়ত অত্যধিক মদ্যপান কৰি আছিল।
বাইক চালকগৰাকীয়ে যুৱতীগৰাকীক গন্তব্যস্থানলৈ লৈ যায় যদিও নিচাগ্ৰস্ত অৱস্থাত থকা যুৱতীগৰাকী বাইকৰ পৰা নামিব পৰা অৱস্থাত নাছিল।
ইয়াৰ পিছত চালকজনে তাইক নিজৰ ঘৰলৈ লৈ যায়। চালকগৰাকীয়ে তেওঁৰ আন এগৰাকী বন্ধুক ঘৰলৈ মাতি আনে আৰু দুয়োগৰাকীয়ে নিশা উপৰ্যুপৰি যুৱতীগৰাকীক ধৰ্ষণ কৰে।
আৰক্ষীৰ মতে, উক্ত ঘটনাৰ দিনা ঘৰটোত এগৰাকী মহিলাও উপস্থিত আছিল আৰু এই ধৰ্ষণকাণ্ডত মহিলাগৰাকীয়েও দুয়ো অভিযুক্তক সহায় কৰিছিল, যাৰ বাবে তেওঁ ধৰ্ষণৰ বলি হোৱা যুৱতীগৰাকীৰ বন্ধুবৰ্গক এই অপৰাধৰ বিষয়ে অৱগত কৰা নাছিল।
ঘটনাৰ পিছদিনা যুৱতীগৰাকীয়ে চেতনা লাভ কৰাৰ পিছত শৰীৰত বিষ অনুভৱ কৰি ওচৰৰ এখন চিকিৎসালয় যায়। প্ৰাথমিক স্বাস্থ্য পৰীক্ষাৰ পিছত চিকিৎসকে ধৰ্ষণৰ বিষয়ে আৰক্ষীক অৱগত কৰে।
এই অভিযোগৰ পাছতে আৰক্ষীয়ে এক অভিযোগ পঞ্জীয়ন কৰে আৰু যুৱতীগৰাকীৰ ভাষ্যৰ আধাৰত দুয়ো অভিযুক্তক গ্ৰেপ্তাৰ কৰে। জিলাখনৰ উপায়ুক্ত প্ৰতাপ ৰেড্ডীয়ে সদৰী কৰা মতে ঘটনাৰ প্ৰমাণৰ বাবে আৰক্ষীয়ে অপৰাধস্থলীত ফৰেনছিক পৰীক্ষা চলায়।
ইফালে বাইক সেৱা এপটোত সুৰক্ষা বৃদ্ধি নিশ্চিত কৰিবলৈ এপটোৰ স্বত্বাধিকাৰীক তলব কৰা হ’ব বুলি উল্লেখ কৰি তেওঁ লগতে এগৰাকী অভিযুক্তৰ পূৰ্বে অপৰাধজনিত ৰেকৰ্ড থকাৰ সন্দেহৰ বাবে আৰক্ষীয়ে দুয়ো অভিযুক্তৰ বিৰুদ্ধে অনুসন্ধান তথা তদন্ত চলাইছে বুলি উল্লেখ কৰে।