ছাত্ৰ হত্যাৰ প্ৰতিবাদত ধুবুৰীৰ বালাজানত ঘাইপথ অৱৰোধ দল-সংগঠনৰ

এটি ৭ বছৰীয়া শিশুৰ বৰ্বৰ হত্যাৰ প্ৰতিবাদত আজি ধুবুৰীৰ গোলকগঞ্জ আৰক্ষী থানাৰ অন্তৰ্গত বালাজানত আমছু, ছাত্ৰ মুক্তিকে ধৰি বিভিন্ন দল-সংগঠনৰ সহযোগত শতাধিক স্থানীয় লোকে ১ ঘণ্টাৰ বাবে ৩১ নং ৰাষ্ট্ৰীয় ঘাইপথ অৱৰোধ কৰি প্ৰতিবাদ সাব্যস্ত কৰে।

প্ৰতিবাদকাৰী সকলে কণমানি ছাত্ৰ আনিছুৰ ৰহমানৰ হত্যাকাৰীক শীঘ্ৰে  কৰায়ত্ত কৰি উচিত শাস্তি প্ৰদানৰ দাবী জনায়।

উল্লেখযোগ্য যে বালাজনৰ জ্ঞানজ্যোতি একাডেমীৰ ছাত্ৰ আনিছুৰ ৰহমান ১১ অক্তোবৰত বিদ্যালয়ৰ পৰা ঘৰলৈ আহি থকা অৱস্থাতে ৰহস্যজনকভাৱে সন্ধানহীন হৈ পৰিছিল।

পিছত শিশুটিৰ পিতৃ ছবিউৰ আলীয়ে গোলকগঞ্জ আৰক্ষী থানাত শিশুটি সন্ধানহীন হৈ থকা সন্দৰ্ভত এখন এজাহাৰ দাখিল কৰে যদিও আৰক্ষীয়ে আনিছুৰৰ কোনো সন্ধান উলিয়াব নোৱাৰিলে।

এজাহাৰত ছবিউৰ আলীয়ে মোকছেৰ আলী নামৰ এজন লোকৰ নাম উল্লেখ কৰিছে। অভিযুক্ত মোকছেৰ আলী নিহত শিশুটিৰ পৰিয়ালৰ সম্পৰ্কীয় বুলি জানিব পৰা গৈছে।

আনহাতে আৰক্ষীয়ে ঘটনা সম্পৰ্কত তদন্ত চলাই থকা হৈছে বুলি জানিবলৈ দি শীঘ্ৰে ইয়াৰ সৈতে জড়িত দোষীক গ্ৰেপ্তাৰ কৰা হ’ব বুলি কয়।