নিটিকিল! ভৰা সংসাৰৰ পাছতো কেনিৰ পৰা বিচ্ছেদ বিচাৰি আবেদন কিম কাৰ্দাছিয়ানৰ

ৰিয়েলিটি শ্ব’ৰ তাৰকা কিম কাৰ্দাছিয়ান আৰু ৰেপাৰ কেনি ৱেষ্টৰ সংসাৰত ভাঙোন আহিছে। কিমে ইতিমধ্যে বিবাহ বিচ্ছেদ বিচাৰি আদালতত আবেদনো জনাইছে।

কিম আৰু কেনিৰ সাত বছৰীয়া বিবাহিত জীৱনত তেওঁলোকৰ সংসাৰলৈ আহিছে চাৰিটাকৈ সন্তান।

কেইবামাহ ধৰি চলি থকা সম্পৰ্কৰ জটিলতাৰ পাছত চেলিব্ৰেটি নিউজ ৱেবছাইট টি এম জেদ-য়ে এই বাতৰি সদৰী কৰে।

বাতৰি অনুসৰি, ৪০ বছৰীয়া কিমে সন্তানকেইটিক আইনী তথা শাৰীৰিকভাৱে নিজৰ জিম্মাত ৰখাৰ বাবে আবেদন জনাইছে।

নিজৰ নিজৰ কৰ্মক্ষেত্ৰত সফল এই দম্পতি গোটেই বিশ্বতে অতি পৰিচিত মুখ।

উল্লেখ্য যে ২০০৭চনত নিজৰ পৰিয়ালৰ ওপৰত নিৰ্মাণ কৰা ৰিয়েলিটি শ্ব’ৰ দ্বাৰাই পৰিচিত লাভ কৰে কিমে। তেতিয়াৰে পৰাই জনপ্ৰিয় হৈ পৰিছে ‘কিপিং উইথ দ্য কাৰ্দাছিয়ানছ’ নামৰ শ্ব’টো।

দম্পতিহালৰ প্ৰথমটো কন্যা সন্তান নৰ্থ ২০১৩ চনৰ জুন মাহত জন্মগ্ৰহণ কৰে। ইয়াৰ পাছৰ বছৰত ছান ফ্ৰান্সিছকোৰ বেছবল ষ্টেডিয়াম ভাড়াত লৈ কিমক বিবাহৰ প্ৰস্তাৱ দিয়ে কেনিয়ে। ৰিয়েলিটি শ্ব’ৰ কেমেৰাৰ সন্মুখত আৰু উপস্থিতি আছিল কিমৰ পৰিয়াল।

২০১৪ চনৰ মে’ মাহত দুয়ো বিবাহপাশত আৱদ্ধ হয়। ২০১৫ত তেওঁলোকৰ দ্বিতীয় সন্তান ছেন্ট ৱেষ্টৰ জন্ম হয়।

আনহাতে, কিমৰ শাৰীৰিক জটিলতাৰ বাবে ছাৰোগেছিৰ (ভাড়াতীয়া মাতৃ) জৰিয়তে তেওঁলোকৰ পৰৱৰ্তী দুটা সন্তান ছিকাগো আৰু চালমৰ জন্ম হয়।