কৃষক নেতা অখিল গগৈৰ মুকলি আকাশৰ তললৈ অহাৰ পথ প্ৰশস্ত

প্ৰায় তিনিমাহ ধৰি কাৰাৰুদ্ধ হৈ থকা কৃষক মুক্তি সংগ্ৰাম সমিতিৰি নেতা অখিল গগৈ মুকলি আকাশৰ তললৈ অহাৰ পথ প্ৰশস্ত হৈ পৰিছে।

ছাৰ্জচিত দাখিলৰ বাবে নিয়াৰ অধিবক্তাই ৯০ দিনৰ সময়সীমা বিচাৰি কৰা আবেদন আজি নিয়া আদালতে নাকচ কৰাৰ পিছতেই দুই এদিনতে কৃষক নেতাগৰাকী মুকলি আকাশৰ তললৈ আহিব বুলি ধাৰণা কৰা হৈছে।

আমাৰ সাংবাদিকৰ আগত এই কথা জনাইছে অখিল গগৈৰ অধিবক্তা কৃষ্ণ গগৈয়ে।

ইফালে অখিল গগৈৰ হৈ নিয়া আদালতত জ্যেষ্ঠ অধিবক্তা জিয়াউল কামাৰে জামিন আবেদন দাখিল কৰি মঙলবাৰৰ ভিতৰত নিয়াৰ গোচৰৰ পৰা মুক্তি লাভ কৰিব বুলি দাবী কৰে।

‘অন্য গোচৰত ষড়যন্ত্ৰমূলকভাৱে আৰক্ষীয়ে গ্ৰেপ্তাৰ নকৰিলে দুই এদিনতে মুকলি আকাশৰ তললৈ অহাৰ সম্ভাৱনা আছে অখিলৰ’, এই মন্তব্য কামাৰৰ।

কামাৰৰ উপৰি শীঘ্ৰে সকলো গোচৰত জামিন মুক্ত হৈ মুকলি আকাশৰ তললৈ অখিল গগৈ আহিব বুলি দাবী অধিবক্তা কৃষ্ণ গগৈৰ।

উল্লেখযোগ্য যে, যোৱা ১২ ডিচেম্বৰত আৰক্ষীয়ে গ্ৰেপ্তাৰ কৰিছিল অখিল গগৈক আৰু ১৪ ডিচেম্বৰত অখিলৰ বিৰুদ্ধে ৰাষ্ট্ৰদ্ৰোহৰ গোচৰ জাপি মাওবাদী সজাইছিল।

গগৈৰ বিৰুদ্ধে NIA য়ে ভাৰতীয় দণ্ডবিধিৰ ধাৰা ১২০ বি (অপৰাধমূলক ষড়যন্ত্ৰৰ শাস্তি), ১২৪ এ (ৰাষ্ট্ৰদ্ৰোহ), ১৫৩ এ (বেআইনী ) আৰু ১৫৩ বি তথা বেআইনী কাৰ্যকলাপ প্ৰতিৰোধ আইন (UAPA)ৰ ধাৰা ১৮ আৰু ৩৯ ডিৰ অধীনত ১৩/২০১৯ নম্বৰৰ গোচৰ ৰুজু কৰিছিল।