হাত দাঙিলে কোহলিৰ RCBয়ে; IPLত দুৰ্দান্ত জয়েৰে অভিযান আৰম্ভ KKRৰ

ৰয়েল ছেলেঞ্জাৰ্ছ বেংগালুৰুৰ বিৰুদ্ধে কলকাতা নাইট ৰাইডাৰ্ছৰ যুঁজখন ইমান একপক্ষীয় হ’ব বুলি কোনেও কল্পনা কৰা নাছিল। কিন্তু আন্দ্ৰে ৰাছেল আৰু বৰুণ চক্ৰৱৰ্তীৰ বিধ্বংসী বলিঙত দিশহাৰা হৈ পৰিল বেংগালুৰুৰ বেটিং লাইন আপ।

বৰ অনায়াসে যেন যুদ্ধ জয় কৰিলে আইপিএলৰ দ্বিতীয় পৰ্বৰ প্ৰথমখন মেচত কলকাতা নাইট ৰাইডাৰ্ছে।

লীগ তালিকাৰ তৃতীয় স্থানত থকা আৰচিবিয়ে সোমবাৰে সন্ধিয়া ফেভাৰিট হিচাপেই খেলপথাৰত নামিছিল। কিন্তু এনেকৈ ছন্দ হেৰুওৱাৰ কথা কোনেও ভাৱিব পৰা নাছিল।

নাইট ৰাইডাৰ্ছৰ বলিঙে আৰম্ভণিতেই বেংগালুৰুৰ টপ অৰ্ডাৰত ধুমুহাৰ সৃষ্টি কৰি কোহলি, ডি ভিলিয়াৰ্ছকে ধৰি বাঘা বাঘা বেটছমেনক পেভলিয়নৰ বাট দেখুৱালে।

খেলখনত ৰাছেল আৰু বৰুণে তিনিটাকৈ উইকেট দখল কৰিলে।

আনহাতে, নিৰ্দিষ্ট ২০ অভাৰত মাত্ৰ ৯৩ৰাণৰ লক্ষ্য অনুসৰণ কৰি অনায়াসে মেচ হাতলৈ আনে কেকেআৰে।

প্ৰথম পৰ্বত সাতখনৰ ভিতৰত পাঁচখনতেই হাৰি পইন্ট তালিকাৰ তলত আছিল কলকাতা। এনে পৰিস্থিতিত নকআউটত উপনীত হোৱাটো যে অতি কঠিন সেয়া ভালদৰেই বুজি পাইছিল নাইট ৰাইডাৰ্ছৰ যুঁজাৰু সেনানীয়ে।

কলকাতাৰ হৈ ৪৮ৰাণৰ এক দুৰ্দান্ত ইনিংছ খেলে শুভমন গীলে। বেংগালুৰুৰ বলাৰে কলকাতাৰ মাত্ৰ এটা উইকেটৰহে পতন ঘটাবলৈ সক্ষম হয়।

অৱশেষত ৯উইকেটত সহজেই বিজয় সাৱ্যস্ত কৰে কলকাতা নাইট ৰাইডাৰ্ছে।

সংক্ষিপ্ত স্ক’ৰ:-

ৰয়েল ছেলেঞ্জাৰ্ছ বেংগালুৰু: ৯২/১০ (পাড়িক্কাল-২২, ৰাছেল- ৯/৩, বৰুণ-১৩/৩)

কলকাতা নাইট ৰাইডাৰ্ছ: ৯৪/১ (গীল-৪৮, চাহাল-২৩/১)

কলকাতা নাইট ৰাইডাৰ্ছ ৯উইকেটত বিজয়ী।