জামিন অগ্ৰাহ্য খেৰী হত্যাকাণ্ডৰ মূল অভিযুক্ত মন্ত্ৰীপুত্ৰৰ

লখিমপুৰ খেৰী হত্যাকাণ্ডৰ মূল অভিযুক্ত কেন্দ্ৰীয় গৃহ ৰাজ্যিক মন্ত্ৰী অজয় মিশ্ৰৰ পুত্ৰ আশীষ মিশ্ৰক বুধবাৰে লখিমপুৰ খেৰী হিংসাৰ গোচৰত আদালতে জামিন প্ৰত্যাখ্যান কৰে।

জ্যেষ্ঠ অভিযোজন বিষয়া এছ পি যাদৱে সংবাদ মাধ্যমৰ আগত কয় যে মুখ্য ন্যায়িক দণ্ডাধীশ চিন্তা ৰামে আশীষ মিশ্ৰ আৰু তেওঁৰ সহযোগী আশীষ পাণ্ডেৰ জামিন আবেদন নাকচ কৰিছে।

১২ ঘণ্টাৰ জেৰাৰ পিছত বিশেষ তদন্তকাৰী দলে ৯ অক্টোবৰত গ্ৰেপ্তাৰ কৰা আশীষ মিশ্ৰক মঙলবাৰে তিনি দিনৰ আৰক্ষী জিম্মালৈ প্ৰেৰণ কৰা হৈছিল।

আদালতে মঙলবাৰে গ্ৰেপ্তাৰ কৰা শেখৰ ভাৰতীকো তিনি দিনৰ বাবে আৰক্ষীৰ জিম্মালৈ প্ৰেৰণ কৰে।

আৰক্ষীয়ে এতিয়ালৈকে গোচৰটোৰ সন্দৰ্ভত চাৰিজন লোকক গ্ৰেপ্তাৰ কৰিছে – আশীষ মিশ্ৰ, লুভকুশ, আশীষ পাণ্ডে আৰু ভাৰতী।

আশীষ মিশ্ৰৰ ঘনিষ্ঠ বন্ধু অংকিত দাস আজি পুৱা লখিমপুৰৰ অপৰাধ শাখা কাৰ্যালয়ত বিশেষ তদন্ত কমিটিৰ সন্মুখত হাজিৰ হয়।

অনুসন্ধানকাৰীসকলে ৩ অক্টোবৰৰ হিংসাত্মক ঘটনাৰ সন্দৰ্ভত দাসক জেৰাৰ বাবে হাজিৰ হ’বলৈ নিৰ্দেশ দিছিল।

উল্লেখ্য যে অংকিত দাস প্ৰাক্তন মন্ত্ৰী অখিলেশ দাসৰ ভতিজা আৰু খেৰীৰ প্ৰতিবাদী কৃষকক মহতীয়াই নিয়া গাড়ীখন তেওঁৰ মালিকানাধীন বুলি জানিব পৰা গৈছে।

মঙলবাৰে অংকিত দাস আৰু লতিফ নামৰ আন এজন অভিযুক্তই মুখ্য ন্যায়িক দণ্ডাধীশৰ সন্মুখত আত্মসমৰ্পণৰ বাবে আবেদন দাখিল কৰিছিল।