বৰপেটাৰ বহৰি সত্ৰ পৰিচালনা সমিতিৰ সদস্যক প্ৰহাৰ কৰা বিজেপি নেতাক গ্ৰেপ্তাৰ
বৰপেটা জিলাত শ্ৰী শ্ৰী হৰিদেৱ মহাপুৰুষে স্থাপন কৰা বহৰি সত্ৰ পৰিচালনা সমিতিৰ প্ৰতিনিধিক আক্ৰমণ কৰা ঘটনাৰ সৈতে জড়িত মূল অভিযুক্ত দীনেশ দাস ক অৱশেষত আৰক্ষীয়ে আজি আটক কৰিবলৈ সক্ষম হয়।
জানিব পৰা মতে আজি পুৱতি নিশা আৰক্ষীয়ে চলোৱা এক অভিযানত গুৱাহাটীৰ বেলতলাৰ সৌৰভ নগৰৰ পৰা গ্ৰেপ্তাৰ কৰা হয় বিজেপি নেতা তথা ৰাষ্ট্ৰীয় স্বয়ংসেৱক সংঘৰ সক্ৰিয় সদস্য দীনেশ দাসক। বৰ্তমান বৰপেটা সদৰ থানাত ৰাখি আৰক্ষীয়ে অভিযুক্ত দাসক ঘটনা সন্দৰ্ভত জেৰা অব্যাহত ৰাখিছে।
উল্লেখযোগ্য যে বহৰি সত্ৰৰ মাটি বেদখলৰ সৈতে জড়িত দীনেশ দাসৰ নেতৃত্বত পৰিয়ালৰ লোকে যোৱা দেওবাৰে সত্ৰ পৰিচালনা সমিতিৰ সদস্যক আক্ৰমণ কৰিছিল। আৰু এই আক্ৰমণত সত্ৰৰ উপ সভাপতি সুৰেন্দ্ৰ নাথ মেধি, সদস্য বৰুণ তালুকদাৰ, প্ৰদীপ তালুকদাৰ আৰু ডালিম দাস বেয়াকৈ আঘাতপ্ৰাপ্ত হৈছিল।
ঘটনা সংঘটিত হোৱাৰ পাছৰে পৰা মূল অভিযুক্ত তথা নিজকে বিজেপিৰ নেতা বুলি পৰিচয় দিয়া দীনেশ দাস পলাতক অৱস্থাত আছিল। আনহাতে উক্ত মাৰ-পিটৰ ঘটনাৰ লগত জড়িত দুজনক ইতিমধ্যে আৰক্ষীয়ে গ্ৰেপ্তাৰ কৰি জে’ললৈ প্ৰেৰণ কৰিছে।
স্মৰ্তব্য যে শ্ৰী শ্ৰী হৰিদেৱ মহাপুৰুষে স্থাপন কৰা বহৰি সত্ৰ পৰিচালনা সমিতিৰ প্ৰতিনিধিক সত্ৰৰ ভূমি বেদখলকাৰীয়ে আক্ৰমণ কৰাৰ ঘটনাৰ পাছৰে পৰা বৃহত্তৰ বহৰি অঞ্চলটোতে এক তীব্ৰ উত্তেজনাময় পৰিৱেশে বিৰাজ কৰি আছিল।
ইফালে জানিব পৰা মতে দীনেশ দাসৰ ভনী আৰু ভনী জোৱায়েকে মিলি দখল কৰি থকা ২৭ বিঘা সত্ৰৰ ভূমি জিলা প্ৰশাসনে বেদখলমুক্ত কৰি সত্ৰখনক চমজাই দিছিল। আৰু তাৰ পিছৰ পৰাই বেদখলকাৰীসকলৰ সৈতে সত্ৰ সমিতিৰ আৰম্ভ হৈছিল সংঘাত৷