বৰপেটা জিলাৰ শ্ৰী শ্ৰী হৰিদেৱ মহাপুৰুষে স্থাপন কৰা বহৰি সত্ৰ পৰিচালনা সমিতিৰ প্ৰতিনিধিক বেদখলকাৰীয়ে আক্ৰমণ কৰাৰ ঘটনাই অঞ্চলটোত চাঞ্চল্যৰ সৃষ্টি কৰিছে। ঘটনা সন্দৰ্ভত জানিব পৰা মতে সত্ৰৰ ভূমি বেদখল কৰি থকা দীনেশ দাসৰ নেতৃত্বত পৰিয়ালৰ লোকে দেওবাৰে সত্ৰ পৰিচালনা সমিতিৰ সদস্যক আক্ৰমণ কৰে।
এই আক্ৰমনত আহত হয় সত্ৰৰ উপ সভাপতি সুৰেন্দ্ৰ নাথ মেধি, সদস্য বৰুণ তালুকদাৰ, প্ৰদীপ তালুকদাৰ আৰু ডালিম দাস ৷ প্ৰদীপ দাস আৰু ডালিম দাসক পেটত লোহাৰ চাবুলেৰে খুচি হত্যাৰো ভাবুকি প্ৰদান কৰে বেদখলকাৰীয়ে ৷ জানিব পৰা মতে দীনেশ দাস স্থানীয় বিজেপি নেতা তথা ৰাষ্ট্ৰীয় স্বয়ংসেৱক সংঘৰ সৈতেও জড়িত ৷
উল্লেখ্য যে,দীনেশ দাসৰ ভনী আৰু ভনী জোৱায়েকে মিলি দখল কৰি থকা ২৭ বিঘা ভূমি জিলা প্ৰশাসনে বেদখলমুক্ত কৰি সত্ৰখনক চমজাই দিছিল। তাৰপিচৰ পৰাই বেদখলকাৰীসকলৰ সৈতে সত্ৰ সমিতিৰ সংঘাত আৰম্ভ হয় ৷
দেওবাৰে সত্ৰ পৰিচালনা সমিতিৰ লেকসকল উক্ত ভূমিত উপস্থিত হোৱাৰ পিচতেই বেদখলকাৰী পৰিয়ালটোৱে সত্ৰ পৰিচালনা সমিতিৰ লোকসকলক আক্ৰমণ কৰে। সত্ৰ পৰিচালনা সমিতিৰ সভাপতি মজুমদাৰ আৰু গাঁও উন্নয়ন সমিতিৰ সম্পাদকৰ নেতৃত্বত সত্ৰ পৰিচালনা সমিতিৰ সদস্যসকল উক্ত স্থানত উপস্থিত হোৱাৰ পিছতেই সংঘটিত হয় এই আক্ৰমনৰ ঘটনা ৷
সত্ৰৰ ভূমি বেদখলকাৰীৰ দ্বাৰা আক্ৰমণৰ এই ঘটনাক লৈ বৃহত্তৰ বহৰি অঞ্চলত তীব্ৰ উত্তেজনাৰ সৃষ্টি হৈছে।
