লংকাৰ এগৰাকী মূলাগাভৰু! উচিত প্ৰত্যুত্তৰে ঘূৰাই পঠালে দোকান বন্ধ কৰাবলৈ অহা বন্ধৰ সমৰ্থকক

আজি সদৌ অসম বাঙালী যুৱ ছাত্ৰ ফেডাৰেইশ্যনৰ অসম বন্ধৰ সময়ত দোকান বন্ধ কৰাবলৈ চেষ্টা কৰা বন্ধৰ সমৰ্থকৰ এটা দলক সঠিক প্ৰত্যুত্তৰেৰে বিমুখ কৰিলে দুগৰাকীমান অসমীয়া গাভৰুৱে। গালি-গালাজ নহয়, উচিত যুক্তিৰে প্ৰতিহত কৰিলে তেওঁলোকৰ অভিপ্ৰায়ক।

ঘটনাটো লংকা সুভাষ নগৰৰ। নিজৰ ঘৰৰ পদূলিত থকা নিজৰ ব্যৱসায় প্ৰতিষ্ঠানখন খোলাৰ লগে লগে আজিৰ অসম বন্ধৰ সমৰ্থকৰ প্ৰায় অৰ্ধ শতাধিক বাঙালী যুৱকে প্ৰথমে আহি যুৱতীগৰাকীৰ লগত বাকযুদ্ধত লিপ্ত হয়।

বন্ধৰ সমৰ্থকৰ দলটোৱে জোৰ কৰি যুৱতীগৰাকীৰ প্ৰতিষ্ঠান বন্ধ কৰিবলৈ বিচৰাত তেওঁলোকক যুৱতীগৰাকীয়ে দৃঢ়তাৰে কয়, “নকৰো দোকান বন্ধ। গলিয়ে গলিয়ে আহি আপোনালোকে দোকান বন্ধ কৰিবলৈ কোন?”

“মানুহকেইজন মৰা কাৰণে আমি দুখ পাইছো। আমিও কেণ্ডেল জ্বলাইছিলো। কিন্তু বন্ধ দিলেই তেওঁলোক ঘূৰি নাহে।” যুৱতীগৰাকীৰ হৈ মাত মতা আন এগৰাকী মহিলাই তেওঁলোকক কয়।

আনহাতে এজন অসমীয়া যুৱকে তেওঁলোকক প্ৰশ্ন কৰে, “আপোনালোকে ২৩ তাৰিখৰ বন্ধক সমৰ্থন কৰিছিল নে?”

মহিলাকেইগৰাকীৰ এগৰাকীয়ে কয়, “দুদিন মানৰ পূৰ্বে এজনী ছোৱালীক জিন্দা জ্বলাই দিছিল। আপোনালোকে বন্ধ দিছিল নে? অসমৰ আনবোৰ হত্যা-ধৰ্ষণত আপোনালোকে কেতিয়াবা বন্ধ দিছিল নে?”

যুৱতীগৰাকীয়ে কয়, “মোৰ এটা প্ৰশ্নৰ উত্তৰ দিয়ক। আপোনালোকৰ বেগলী মানুহ এজনে যে এজনী বেংগলী ছোৱালীক ৰেইপ কৰিছিল, আপোনালোকে বন্ধ কিয় দিয়া নাছিল?”

“বন্ধই কাৰো একো লাভ নকৰে, একো সমস্যা সমাধান নকৰে। ৰাজনীতি ইয়াত নহয়।” এইবুলি কৈ দোকান বন্ধ নকৰো বুলি দৃঢ়তাৰে জনাই দিয়ে।

ইফালে বন্ধৰ সমৰ্থকসকলে এই সমগ্ৰ ঘটনাটোৰ ৰেকৰ্ডিং কৰি থাকে। বন্ধৰ সমৰ্থকসকলে তেওঁক ভাবুকি দিয়াৰো অভিযোগ আনিছে যুৱতীগৰাকীয়ে।

আনহাতে যুৱতীগৰাকীয়েও সকলো দৃশ্য নিজৰ ম’বাইলত আবদ্ধ কৰি ৰাখে। পিছত তেওঁ ঘটনা সম্বন্ধে লংকা আৰক্ষীক অৱগত কৰা বুলি জানিব পৰা গৈছে।
“>