কিংবদন্তি সুৰ সম্ৰাজ্ঞী, ভাৰতৰত্ন লতা মংগেশকাৰৰ দেহাৱসান
কিংবদন্তি সুৰ সম্ৰাজ্ঞী, ভাৰতৰত্ন কোকিলকণ্ঠী লতা মংগেশকাৰৰ দেহাৱসান ঘটিছে। মৃত্যুৰ সময়ত তেওঁৰ বয়স হৈছিল ৯২বছৰ। দেওবাৰে পুৱা ৮ বাজি ১২ মিনিটত ইহলীলা সম্বৰণ কৰে সংগীত জগতৰ অপ্ৰতিদ্বন্দ্বী কণ্ঠশিল্পীগৰাকীয়ে।
প্ৰায় চাৰি সপ্তাহ ধৰি হাস্পাতালত ভৰ্তি হৈ আছিল কণ্ঠশিল্পীগৰাকী। মাজতে কিছু সুস্থ হোৱাৰ খৱৰ আহিছিল যদিও শনিবাৰে হঠাতে তেওঁৰ স্বাস্থ্যৰ অৱনতি ঘটাত তেওঁৰ পুনৰ ভেন্টিলেশ্যনত দিয়া হৈছিল যদিও তাৰ পৰা আৰু তেওঁ উভতি নাহিল।
কোভিড আক্ৰান্ত হোৱাৰ পিছত যোৱা ১১ জানুৱাৰীত মুম্বাইৰ ব্ৰীছ কেণ্ডি হাস্পাতালত ভৰ্তি কৰা হৈছিল সুৰ সম্ৰাজ্ঞীগৰাকীক।
ইয়াৰ পূৰ্বেও শিল্পীগৰাকীক সংকটজন অৱস্থাত একাধিকবাৰ হাস্পাতালত ভৰ্তি কৰোৱা হৈছিল। কিন্তু প্ৰতিবাৰেই অনুৰাগীক আশ্বস্ত কৰি সুস্থ হৈ উভতি আহিছিল লতা মংগেশকাৰ।
১৯২৯চনৰ ২৮ ছেপ্টেম্বৰত এক মাৰাঠী পৰিয়ালত জন্মগ্ৰহণ কৰিছিল লতা মংগেশকাৰে। মাত্ৰ ১৩ বছৰ বয়সতে পিতৃক হেৰুওৱাইছিল সুৰ সম্ৰাজ্ঞীগৰাকীয়ে।
লতা মংগেশকাৰে ১৩ বছৰ বয়সতে মাৰাঠী চলচ্চিত্ৰত গান গাবলৈ আৰম্ভ কৰিছিল। মুম্বাইলৈ অহাৰ পাছত ১৯৪৮ চনত প্ৰথম বাৰ বলীউদৰ হিন্দী ছবি ‘মজবুৰ’ত গান গাইছিল।
কিংবদন্তি কণ্ঠশিল্পীগৰাকীৰ মৃত্যুত দেশজুৰি অনুৰাগীসকল শোকস্তব্ধ হৈ পৰিছে।