সন্তানৰ অত্যাচাৰত আনৰ ঘৰত আশ্ৰয় লৈ থকা বৃদ্ধ পিতৃ-মাতৃৰ দায়িত্ব ল’লে ন্যায় সেৱা প্ৰাধিকাৰীয়ে

নগাঁৱৰ কাকী মৌজাৰ অন্তৰ্গত ২ নং কাকীৰ দেউবালি গাঁৱৰ কনিষ্ঠ পুত্রৰ অত্যাচাত নিজ হাতে গঢ় দিয়া ঘৰত থাকিব নোৱাৰি বৃদ্ধ পিতৃ-মাতৃয়ে আনৰ ঘৰত আশ্ৰয় ল’ব লগা হোৱাৰ এক কৰুণ ঘটনাই সমগ্ৰ কাকী অঞ্চলৰ সচেতন লোককে মৰ্মাহত কৰি তুলিছে।

প্ৰায় ৮০ উৰ্ধ্বৰ ২ নং কাকীৰ দেউবালি গাঁৱৰ নিবাসী প্ৰফুল্ল নাথ আৰু হোমেশ্বৰী দেৱী (৭০) নামৰ এই বৃদ্ধ দুজনে নিজৰ কনিষ্ঠ পুত্র সোণেশ্বৰ নাথৰ হাতত জীৱন হেৰুওৱাৰ ভয়ত আজি প্ৰায় এবছৰৰ অধিক সময় আনৰ ঘৰে ঘৰে আশ্ৰয় লৈ থাকিব লগা হৈছে।

চাৰিগৰাকী কন্যা সন্তান, দুজন পুত্র সন্তানৰ লগতে দুগৰাকীকৈ বোৱাৰী কেইবাজনো নাতি নাতিনীৰে এখন সুখৰ-সুন্দৰ সংসাৰ, নিজা ঘৰ-দুৱাৰ, সা-সম্পত্তি, খেতি-বাতি থকাৰ পাছতো কনিষ্ঠ পুত্র সোণেশ্বৰ নাথৰ বহু অত্যাচাৰৰ ফলত একমাত্র নিজৰ প্ৰাণৰ মমতাত তেওঁলোকে সকলো ত্যাগ কৰে।

আনকি পুত্রৰ নিৰ্যাতন সহিব নোৱাৰি বিবাহিত কন্যাৰ লগতে গাঁৱৰ আনৰ ঘৰত আশ্ৰয় লৈ থাকিবলগীয়া হোৱাৰ সময়তে শুকুৰবাৰে একাংশ সংবাদ মাধ্যমত প্ৰকাশিত বাতৰিৰ আলম লৈ বৃদ্ধ প্ৰফুল্ল নাথৰ ২ নং কাকীৰ দেউবালিস্থিত নিজা ঘৰত উপস্থিত হয় নগাঁও জিলা আইন সেৱা প্ৰাধিকাৰীৰ সম্পাদিকা প্ৰনিতা মৰাঙৰ নেতৃত্বত এটি সঁ‌জাতি দল।

সঁ‌জাতি দলটোত নগাঁৱৰ অধিবক্তাদ্বয় ৰূপালী গোস্বামী, শ্বাহনাজ চুলতানাৰ লগতে আইনী সেৱাৰ স্বেচ্ছাসেৱক দিপেন্দ্ৰ শইকীয়া, পাপুমনি বৰাও উপস্থিত হয়। দুপৰীয়া ১২:৩০ বজাত সঁ‌জাতি দলটোৱে কাকী থানাৰ ভাৰপ্ৰাপ্ত আৰক্ষী বিষয়া জন্ বে’ক লগত লৈ প্ৰফুল্ল নাথৰ দেউবালিস্থিত ঘৰত উপস্থিত হৈ ঘটনাৰ সবিশেষ জানি দুয়েগৰাকী বৃদ্ধলোকক নিজৰ গাড়ীৰে ৰাঙলুস্থিত গ্ৰাম বিকাশ পৰিষদৰ বৃদ্ধ আৱাসলৈ আনে।

ইয়াৰ পূৰ্বে দুয়োগৰাকী বৃদ্ধকে নীলবাগান মডেল হাস্পতালত স্বাস্থ্য পৰীক্ষা কৰোৱা হয়। উল্লেখ্য যে, বৃদ্ধ দুগৰাকীৰ কনিষ্ঠ পুত্র সোণেশ্বৰ নাথে তিনিবাৰকৈ ডিঙি চেপি প্ৰাণে মৰাৰ চেষ্টা চলাইছিল বুলিও মাতৃ হোমেশ্বৰী দেৱীয়ে জানিবলৈ দিয়ে। ২৪ বিঘা মাটি দুয়োজন পুত্রৰ মাজত  ভগাই দিয়াৰ পাছতো পিতৃ-মাতৃৰ নামত থকা ৪ বিঘা মাটি কনিষ্ঠ পুত্রক লিখি নিদিয়াৰ বাবে এইদৰে নিজ জন্মদাতা পিতৃ-মাতৃক নিৰ্যাতন চলাইছে বুলি পৰিয়ালৰ লোকৰ লগতে গাঁৱৰ সচেতন লোকে জানিব দিছে।

স্মৰ্তব্য যে, দুজন পুত্র সন্তানৰ কনিষ্ঠ পাষাণ পুত্রৰ এনে অত্যাচাৰৰ বলি হৈ আনৰ ঘৰত আশ্ৰয় ল’ব লগা হোৱা বৃদ্ধ দুয়োগৰাকীক গাঁওবাসীয়ে কেনেদৰে সহায় কৰিব পাৰি তাক লৈ গুণাগঁথা চলি থকাৰ মাজতে শুকুৰবাৰে ন্যায় সেৱা প্ৰাধিকাৰীয়ে দুয়োগৰাকীক নিজগৃহৰ পৰা উদ্ধাৰ কৰিবলৈ সক্ষম হয়।

নগাঁও জিলা ন্যায় সেৱা প্ৰাধিকাৰীৰ এনে প্ৰশংসনীয় কাৰ্যক কাকী অঞ্চলৰ সচেতন ব্যক্তিসকলে আদৰণি জনোৱাৰ লগতে শলাগ লৈছে।