কামাখ্যাত নাহৰফুটুকীৰ সন্ত্ৰাস : গুৰুতৰভাৱে আহত তিনিজন লোক

গুৱাহাটীৰ কামাখ্যাত আজি পুৱাই এটা নাহৰফুটুকী বাঘে সন্ত্ৰাস চলাই তিনিজনকৈ লোকক গুৰুতৰভাৱে আহত কৰে।

ঘটনা অনুসৰি যোৱা নিশাৰে পৰা কামাখ্যাৰ শংকু শৰ্মা নামৰ লোক এজনৰ ষ্ট’ৰ ৰুমত নাহৰফুটুকী বাঘ এটা সোমাই আছিল। পুৱা শংকু শৰ্মাৰ ভগ্নী গীতা দেৱীয়ে ষ্ট’ৰ ৰুমটোত প্ৰৱেশ কৰিব খোজাৰ সময়তেই বাঘটোৱে আক্ৰমণ কৰে।

বাঘটোৰ আক্ৰমণত গীতা দেৱী আহত হোৱাৰ লগতে বাঘটোৰ আক্ৰমণৰ পৰা ভগ্নী গীতা দেৱীক ৰক্ষা কৰিবলৈ যোৱা শংকু শৰ্মাও আহত হয়।

ইয়াৰ পাছতে বাঘটো কামাখ্যা মন্দিৰৰ কৰ্মচাৰী ক্ষিতীশ শৰ্মাৰ ঘৰত প্ৰৱেশ কৰি তেওঁৰ পত্নীক আক্ৰমণ কৰে।

ইপিনে, ঘটনাৰ পাছতে তাত উপস্থিত হোৱা স্থানীয় ৰাইজে নাহৰফুটুকীটোক কৌশলেৰে ঘৰটোৰ ভিতৰতে আবদ্ধ কৰিবলৈ সক্ষম হয়।

নাহৰফুটুকী বাঘটোৰ আক্ৰমণত আহত হোৱা শংকু শৰ্মা, গীতা দেবী আৰু জয়মতী দেৱীক ততাতয়াকৈ মালিগাঁৱৰ সঞ্জীৱনী হাস্পাতলত ভৰ্তি কৰোৱা হৈছে।

জন বসতিপূৰ্ণ অঞ্চলটোত বাঘৰ সন্ত্ৰাসৰ ঘটনাক কেন্দ্ৰ কৰি এক আতংকময় পৰিস্থিতিৰ সৃষ্টি হয়। জানিব পৰা মতে, বাঘটো উদ্ধাৰ কৰিবলৈ ঘটনাস্থলীত বন বিভাগৰ লোক উপস্থিত হোৱা নাই।