হিমন্ত বিশ্বৰ শৰ্মাৰ দৰেই মোক বিজেপিত ভৰ্তি কৰোৱাৰ কৌশল চলিছে: মনীষ চিছ’দিয়া
“হিমন্ত বিশ্বৰ শৰ্মাৰ দৰেই মোক বিজেপিত ভৰ্তি কৰোৱাৰ কৌশল চলিছে।” আজি এক সংবাদমেলত এই গুৰুত্বপূৰ্ণ অভিযোগ উত্থাপন কৰিছে দিল্লীৰ উপ মুখ্যমন্ত্ৰী মনীষ চিছ’দিয়াই।
আজি এক মেছেজযোগে বিজেপিয়ে আপ ত্যাগ কৰি বিজেপিত যোগদান কৰিলেই সকলো অভিযোগৰ পৰা চিছ’দিয়াক মুকলি কৰাৰ প্ৰস্তাৱ আগবঢ়াইছে বুলি আপ নেতাগৰাকীয়ে অভিযোগ কৰিছিল।
এক টুইটযোগে বিজেপিৰ এই প্ৰস্তাৱৰ প্ৰত্যুত্তৰ দি চিছ’দিয়াই লগতে কয়, “মই এজন ৰাজপুত আৰু মহাৰাণা প্ৰতাপৰ বংশধৰ। মই মোৰ মূৰ কাটি পেলাব পাৰোঁ, কিন্তু মই দুৰ্নীতিগ্ৰস্ত-ষড়যন্ত্ৰকাৰীসকলৰ সন্মুখত মূৰ নোদোৱাওঁ।”
চিছ’ডিয়াই লগতে তেওঁৰ বিৰুদ্ধে উত্থাপিত সকলো গোচৰ মিছা বুলি দাবী কৰি বিজেপিয়ে যি কৰিব বিচাৰে কৰক বুলিও প্ৰত্যাহ্বান জনায়।
উল্লেখ্য যে যোৱা বৰ্ষত গ্ৰহণ কৰা আবকাৰী নীতিত দুৰ্নীতিৰ অভিযোগত চিছ’দিয়াৰ বিৰুদ্ধে চিবিআইয়ে তদন্ত কৰি আছে। বৃহস্পতিবাৰে চিছ’দিয়াৰ বাসগৃহত ১৫ ঘণ্টা ধৰি তালাচী চলাইছিল তদন্ত সংস্থাটোৱে।
এই তালাচীৰ পিছত চিছ’দিয়াৰ লগতে আপ মুৰব্বী তথা দিল্লীৰ মুখ্যমন্ত্ৰী কেজৰিৱালে তদন্তকাৰী সংস্থাটোৱে তালাচী চলালেও কোনো দুৰ্নীতিৰ তথ্য-প্ৰমাণ বিচাৰি নাপায় বুলি দাবী কৰিছিল।
ইফালে চিবিআইয়ে দেওবাৰে চিছ’দিয়াৰ নামত ‘লুক আউট’ জাননী জাৰি কৰিছিল। তাকে লৈ প্ৰধানমন্ত্ৰী নৰেন্দ্ৰ মোদীক সমালোচনা কৰি চিছ’দিয়াই দিল্লীতে মুকলিকৈ ঘূৰি ফুৰাৰ পাছতো তেওঁক বিচাৰি পোৱা নাই নেকি বুলি প্ৰধানমন্ত্ৰী মোদীক উপহাস কৰিছিল।
উল্লেখ্য যে চিছ’দিয়াই আজি ৰাজনৈতিক প্ৰচাৰৰ উদ্দেশ্যে অৰবিন্দ কেজৰিৱালৰ সৈতে গুজৰাট ভ্ৰমণ কৰিছে। চিবিআইৰ অভিযানৰ পিছতে তেওঁ প্ৰথমবাৰৰ বাবে দিল্লীৰ বাহিৰলৈ ভ্ৰমণ কৰিছে।