আশাহত চিছ’দিয়া, সুদূৰপৰাহত জামিনঃ পুনৰ বৃদ্ধি ন্যায়িক জিম্মাৰ ম্যাদ

সুৰা নীতিৰ কেলেংকাৰী গোচৰত কাৰাৰুদ্ধ আপ নেতা তথা দিল্লীৰ প্ৰাক্তন উপ-মুখ্যমন্ত্ৰী মনীষ চিছ’দিয়াৰ মুকলি আকাশৰ তললৈ অহাৰ আশা আৰু কিছুদিনলৈ ম্লান পৰিছে।

আজি দিল্লীৰ এখন আদালতে আবকাৰী নীতিৰ কথিত কেলেংকাৰীৰ সৈতে জড়িত ধন সৰবৰাহৰ গোচৰত আম আদমি পাৰ্টিৰ নেতাগৰাকীৰ ন্যায়িক জিম্মাৰ ম্যাদ পুনৰ বৃদ্ধি কৰে।

আদালতৰ এই ৰায়ৰ পিছত অহা ১৮ এপ্ৰিললৈ বৃদ্ধি পায় চিছ’দিয়াৰ ন্যায়িক জিম্মাৰ ম্যাদ। একেটা গোচৰতে শেহতীয়াকৈ চিছ’দিয়াৰ দলীয় সতীৰ্থ সঞ্জয় সিঙে জামিন লাভ কৰিলেও চিছ’দিয়াৰ জামিনৰ আশা পুনৰবাৰ নিৰ্বাপিত হয়।

চিছ’দিয়াৰ লগতে এই গোচৰত সম্প্ৰতি কাৰাৰুদ্ধ হৈ আছে আপৰ মুৰব্বী তথা দিল্লীৰ মুখ্যমন্ত্ৰী অৰবিন্দ কেজৰিৱাল। দলৰ এই দুই শীৰ্ষ নেতাৰ অনুপস্থিতি আগন্তুক লোকসভা নিৰ্বাচনৰ প্ৰাকক্ষণত স্বাভাৱিকতেই দলটোৰ বাবে বিপৰ্যয়স্বৰূপ হৈ পৰিছে।

উল্লেখ্য যে, দিল্লী আবকাৰী নীতি ২০২১-২২ৰ খচৰা প্ৰস্তুত আৰু ৰূপায়ণৰ ক্ষেত্ৰত দুৰ্নীতিৰ অভিযোগত চিবিআইয়ে বিগত বৰ্ষৰ ২৬ ফেব্ৰুৱাৰীত চিছ’দিয়াক গ্ৰেপ্তাৰ কৰিছিল।

ইয়াৰ পিছতে এই সুৰা নীতিৰ ধন সৰবৰাহৰ অভিযোগত ৯ মাৰ্চত তিহাৰ কাৰাগাৰতে চিছ’ডিয়াক গ্ৰেপ্তাৰ কৰিছিল আন এটা কেন্দ্ৰীয় তদন্তকাৰী সংস্থা এনফৰ্চমেণ্ট ডাইৰেক্টৰেটে।