নাহৰফুটুকীৰ আক্ৰমণত মৃত্যু হোৱা পিতৃলৈ বাট চাই আছে দুৰ্ভগীয়া কণমানিয়ে

‘দেউতা উভটি আহিব, পূজাত মোৰ কাৰণে জোতা, চেণ্ডেল নতুন কাপোৰ আনিব, দেউতাৰ লগত পূজা চাবলৈ যাম।‘

এই ভাষ্য যোৱাবছৰ নৱেম্বৰ মাহত নাহৰফুটুকীৰ আক্ৰমণত মৃত্যুক সাৱটি ল’বলগীয়া হোৱা পিতৃহাৰা আৰিফ আলি নামৰ এটি ৬ বছৰীয়া কণমাণিৰ ভাষ্য। এইদৰে ধীৰেনপাৰাৰ অবুজন কণমাণিটোৱে  দেউতাকৰ মৃত্যুৰ পাছতো আশাৰে বাট চাই আছে।

কণমাণিটোৱে মাতৃৰ আগত ‘দেউতা আহিব, আমি পুজা চাবলৈ যাম’ বুলি বাৰেপতি কৈ থাকে যদিও মাতৃ আৰিফা বেগম ওৰফে ৰঞ্জিতা দেবীয়ে কণমাণিটোক বুজাব পৰা নাই যে, তাৰ পিতৃ কোনোদিন আৰু এই পৃথিবীলৈ ঘুৰি নাহে। একমাত্ৰ ৬ বছৰীয়া সন্তানটিকে বুকুত লৈ জীৱন সংগ্ৰামত ব্ৰতী আছে ৰঞ্জিতা।

উল্লেখযোগ্য যে, মৃত আনোৱাৰ আলি পেচাত এগৰাকী টেম্প’চালক আছিল। টেম্প’ চলাই ৰঞ্জিতা আৰু তেওঁৰ ৬ বছৰীয়া সন্তানটোক পোহপাল দি আছিল যদিও তেওঁৰ মৃত্যুৰ পাছত এতিয়া আলৈ আথনি নোহোৱা হৈছে পৰিয়ালটোৰ।

ইফালে বন বিভাগে দুৰ্ভগীয়া ৰঞ্জিতাক ৪ লাখ টকাৰ এককালীন সাহায্য প্ৰদান কৰাৰ কথা ঘোষণা কৰিছিল যদিও আজিও সেয়া মাথো ফাইলৰ মাজতে আৱদ্ধ হৈ আছে।

ৰঞ্জিতাই এই সম্পৰ্কত আমাক কয়, ‘’বন বিভাগৰ তৰফৰ পৰা ৪ লাখ টকা এককালীন সাহায্য লাভ কৰিব বুলি ঘৰত আহি কৈ গৈছিলহি। চৰকাৰৰ তৰফৰ পৰা সাহায্য লাভৰ বাবে প্ৰয়োজনীয় নথিসমূহ এমাহৰ ভিতৰত ফটাশিল-আমবাৰীস্থিত বন-বিভাগৰ কাৰ্য্যলয়ত জমা দি আহিছিল। টকাখিনি অতি সোনকালে পাব বুলি কৈছিল।‘’

কিন্তু দুৰ্ভগীয়া ৰঞ্জিতাই বন বিভাগৰ দায়িত্বজ্ঞানহীনতাৰ বাবেই উক্ত ধনৰাশি বৰ্তমানলৈকে পোৱা নাই।

আনহাতে, মহিলাগৰাকীৰ নাম প্ৰকৃততে ৰঞ্জিতা দেবী আছিল যদিও মূছলমান সম্প্ৰদায়ৰ লোকলৈ বিয়া হোৱাত তেওঁৰ নাম কৰ্ট এফিডেফিট কৰি আৰিফা বেগমলৈ পৰিৱৰ্তিত কৰা হ’ল। ব্ৰাহ্মণ পৰিয়ালৰ জীয়ৰী হৈয়ো মুছলমান সম্প্ৰদায়ৰ লোকৰ সৈতে বিবাশপাশত আৱদ্ধ হোৱাৰ বাবে ৰঞ্জিতাক ঘৰৰ মানুহেও এলাগী কৰা বুলি ৰঞ্জিতাই আমাক জনায়।

উল্লেখযোগ্য যে, বৰ্তমান দুৰ্ভগীয়া আৰিফা ওৰফে ৰঞ্জিতা দেবী একমাত্ৰ সন্তানৰ কথা চিন্তা কৰি লোকৰ ঘৰে ঘৰে কাম-বন কৰি যেনে-তেনে চলি আছে।

তেওঁ কয়, ‘’মই নিজে নাখাই হ’লেও ল’ৰাটোক খুৱাব লাগিব, ল’ৰাটোৱে ভোক সহ্য কৰিব নোৱাৰে। স্বামীৰ পৰিয়ালৰ মানুহেও মোক চোৱা-চিতা নকৰে, কাৰণ তেওঁলোকৰ নিজৰে ঘৰৰ অৱস্থা বেয়া। সেয়ে মই মানুহৰ ঘৰে-ঘৰে কাম কৰি ল’ৰাটোক পোহপাল দি আছো।‘’

আনহাতে, নাহৰফুটুকীয়ে আক্ৰমণ কৰা ঘটনা বিবৰণী জানিব বিচৰাত তেওঁ আমাৰ সাংবাদিকৰ আগত কয়, ‘’সেই দিনটোতো তেওঁ টেম্প’ চলাই ঘৰলৈ দুপৰীয়া ১ মান বজাত ঘৰলৈ আহিছিল। তেনেতে কাষৰে বিদ্যালয়খনৰ পাছফালৰ হাবিত বাঘ ওলাইছে বুলি গম পোৱাত তেওঁ দৌৰি ঘটনাস্থলীত উপস্থিত হয়গৈ। নাহৰফুটুকীটো আৱিৰ্ভাব হোৱা স্কুলখনৰ কোঠাত এটা সৰু ল’ৰা আৱদ্ধ হৈ থকা বুলি আনোৱাৰে জানি মানবীয়তাৰ খাতিৰত বাঘটোৰ সন্মুখৰ পৰা ল’ৰাটোক উদ্ধাৰ কৰে যদিও নাহৰফুটুকীৰ আক্ৰমণত আনোৱাৰ বেয়াকৈ আঘাতপ্ৰাপ্ত হয়। তেওঁক ততাতৈয়াকৈ জিএমচিএইছলৈ নিয়া হয় যদিও উন্নত চিকিৎসাৰ অভাৱত চাৰিদিন পাছতেই অৰ্থ্যাৎ ১৬ নবেম্বৰত তেওঁ মৃত্যুক সাবটি লয়।‘’

ধীৰেনপাৰাৰ চম্পাৱতী উচ্চ মাধ্যমিক বিদ্যালয়ৰ কাষৰে দুৰ্ভগীয়া ৰঞ্জিতাই নৰ্থ ইষ্ট নাওৰ জৰিয়তে বন বিভাগে প্ৰদান কৰিম বুলি ঘোষণা কৰা ৪ লাখ টকা দিবৰ বাবে কাতৰ আহ্বান জনায়।