CBSE ৰ দশম শ্ৰেণীৰ ফলাফল: ৫০০ৰ ভিতৰত ৪৯৯ নম্বৰেৰে চমক বিশ্বনাথৰ মধুপুৰৰ লোচনা বাচতোলাৰ

Lochana Bastola from Biswanath shines বিশ্বনাথ চাৰিআলিৰ জৱাহৰ নৱোদয় বিদ্যালয়ৰ ছাত্ৰী লোচনা বাচতোলাই (Lochana Bastola) শুকুৰবাৰে ঘোষিত হোৱা চি বি এছ ইৰ দশম শ্ৰেণীৰ চূড়ান্ত পৰীক্ষাৰ ফলাফলত অনন্য সফলতা লাভ কৰিছে।

শোণিতপুৰ জৱাহৰ নৱোদয় বিদ্যালয়ৰ ছাত্ৰী লোচনাই মুঠ ৫০০ নম্বৰৰ ভিতৰত ৪৯৯নম্বৰ লাভ কৰিবলৈ সক্ষম হৈছে।

চলিত বৰ্ষৰ পৰা স্থানপ্ৰাপ্তৰ নাম প্ৰকাশত কিছু নতুন নিয়ম বলবৎ কৰাত লোচনাৰ স্থান এতিয়াও ঘোষণা কৰা নাই যদিও এই নম্বৰ লাভৰ ক্ষেত্ৰত এই গৰাকী শিক্ষাৰ্থীয়ে অভিলেখ সৃষ্টি কৰিছে বুলি চৰ্চা লাভ কৰিছে।

শ্বিলং মণ্ডলৰ জৱাহৰ নৱোদয় শিক্ষা সমিতিৰ অধীনৰ বিশ্বনাথৰ নৱোদয় বিদ্যালয়ত লোচনাই ইংৰাজী, গণিত,অসমীয়া, সমাজ বিজ্ঞান বিষয়ত ১০০ নম্বৰকৈ লাভ কৰাৰ বিপৰীতে বিজ্ঞান বিষয়ত ৯৯ নম্বৰ লাভ কৰিছে।

শ্বিলং মণ্ডলৰ জৱাহৰ নৱোদয় বিদ্যালয়ৰ ভিতৰত লোচনাৰ এই সাফল্য অভিলেখ বুলি বিবেচিত হৈছে।

সম্প্ৰতি বিজ্ঞান শাখাত নামভৰ্তি কৰি ভৱিষ্যতে চিকিৎসক হোৱাৰ মন বুলি সাংবাদিকক জনাইছে লোচনাই। নিদিষ্ট ৰুটিন অনুসৰণ নকৰাকৈ বিদ্যালয়ৰ শিক্ষাগুৰুৰ জৰিয়তে এই সফলতা লাভত অত্যন্ত সুখী লোচনা।

ইতিমধ্যে লোচনাৰ ফলাফল লাভৰ পিছতে শ্বিলং মাণ্ডলিক কাৰ্যালয়ৰ শীৰ্ষ বিষয়াই লোচনাক অভিনন্দন জ্ঞাপন কৰে।

বিশ্বনাথৰ গোপাল শৰ্মা বাচতোলা আৰু মেনকা বাচতোলাৰ কন্যা লোচনাই ষষ্ঠ শ্ৰেণীৰ পৰা বিশ্বনাথৰ জৱাহৰ নৱোদয় বিদ্যালয়ত অধ্যয়ন কৰি আহিছে।

ছাত্ৰী গৰাকী বৰ্তমান গুৱাহাটীত আছে। শনিবাৰে পুৱা ১০ বজাত নৱোদয়ত আনুষ্ঠানিকভাৱে লগ কৰিব নৱোদয় বিদ্যালয়খনৰ অধ্যক্ষগৰাকীয়ে।