লকডাউন: ভোকত ওলাই আহিল পদপথৰ ভিক্ষাৰী, খাবলৈ দিলে কৰ্তব্যৰত আৰক্ষীয়ে
কৰ’না সংক্ৰমণ ৰোধৰ বাবে প্ৰধান মন্ত্ৰী নৰেন্দ্ৰ মোদীয়ে ঘোষণা কৰিছিল লকডাউন৷ ২৪ মাৰ্চৰ পৰা ২১ দিনীয়া লকডাউনৰ ঘোষাণা কৰাৰ পিছত লকডাউন ৩ মেলৈ বৃদ্ধি কৰা হয়৷
লকডাউনত বহুজনে অনাহাৰে দিন কটাব লগা হৈছে। যদিওবা বিভিন্নজনে সহায়ৰ হাত আগবঢ়াই পদপথৰ ভিক্ষাৰী তথা দৰিদ্ৰ লোকসকলৰ বাবে ওলাই আহিছে তথাপিও এই সাহায্যৰ পৰা বঞ্চিত আছে একাংশ পদপথৰ বাসিন্দা৷
লতাশিলত এনেদৰে খাদ্যৰ সন্ধানত ওলাই আহিছে এজন বিশেষভাৱে সক্ষম ব্যক্তি৷ উল্লেখ্য যে বিগত ৬-৭ দিন ধৰি অনাহাৰে কটাইছে ব্যক্তিজনে৷ ভৰলুমুখৰ ফুটপাথৰ বাসিন্দা এওঁ৷
তেওঁৰ হাতত খাবলৈ একোৱেই নাই সেয়ে ওলাই আহিছে ৰাজপথলৈ৷ কিন্তু শূন্য ৰাজপথত খুজিবলৈ কোনোৱেই নাই৷
কৰ’নাৰ ভয়াৱহতা পাহৰি এমুঠি ভাতৰ বাবে হাহাকাৰ কৰিছে এইজন বিশেষভাৱে সক্ষম ব্যক্তিয়ে৷ কোনোবাই যদি সহায় কৰিছে, কোনোবাই কৰা নাই৷
ব্যক্তিজনৰ অৱস্থা দেখি কৰ্তব্যৰত আৰক্ষীয়ে তেওঁক বিস্কুট,কেক আদি খাবলৈ দিয়ে।
উল্লেখ্য যে অসম আৰক্ষীয়ে বিভিন্ন ঠাইত পদপথৰ বাসিন্দাকে ধৰি ভোকাতুৰ লোকসকলৰ মাজত খাদ্য সামগ্ৰী বিতৰণ কৰি আহিছে।
দ্বিতীয় পৰ্যায়ৰ লকডাউনৰ আজি দ্বিতীয়টো দিন।
২০ এপ্ৰিললৈকে কঠোৰভাৱে পালন হ’ব লগা লকডাউনৰ ফলত সমগ্ৰ দোকান-পোহাৰ বন্ধ হৈ পৰিছে। ৰাজপথবোৰো হৈ পৰিছে জনশূন্য৷ যাৰ ফলত অনাহাৰে কটাবলগীয়া হৈছে একাংশ ভিক্ষাৰীয়ে।
উল্লেখযোগ্য যে ব’হাগৰ প্ৰথম দিনটোতেই খাবলৈ নাপাই মৃত্যুবৰণ কৰিছিল মহানগৰীৰ এজন ভিক্ষাৰীয়ে।
এতিয়া আশা মাথো এটাই এই ঘটনাৰ যেন পুনৰাবৃত্তি নহওক। পদপথৰ বাসিন্দাসকলৰ বাবে বৰ্তমানতকৈ বৃদ্ধি হওক সাহায্যৰ সংখ্যা। সামৰ্থ্য অনুযায়ী এওঁলোকৰ বাবে যোগান হওক খাদ্যৰ৷