‘য’তে বাঘৰ ভয়, তাতে ৰাতি হয়’: আমিনগাঁৱৰ গুদামত ই ভি এমক লৈ আৰ পি শৰ্মা

তেজপুৰৰ পৰা মাজনিশা আমিনগাঁৱৰ গুদামলৈ “অব্যৱহৃত’’ ই ভি এম অনাক লৈ বিৰোধী কংগ্ৰেছৰ পিছত এইবাৰ মুখ খুলিছে আৰ পি শৰ্মাই।

“য’তে বাঘৰ ভয়, তাতে ৰাতি হয়। তেজপুৰক লৈ আৰ পি শৰ্মা আৰু হিমন্ত বিশ্ব শৰ্মাৰ মাজত তক্কৰ চলি থকাৰ মাজত ৰাতি ৰাতি ই ভি এমৰ স্থানান্তৰণ– ই অত্যন্ত সন্দেহজনক। তাতে আকৌ জালুকবাৰী সমষ্টিহে ই ভি এম ৰাখিবলৈ বাচি লোৱা হৈছে কিয়?” সাংসদ আৰ পি শৰ্মাৰ প্ৰশ্ন।

ই ভি এমৰ স্থানান্তৰকৰণত নিৰ্বাচন আয়োগৰ অনুমতি থকা নথকাকলৈয়ো সন্দেহ প্ৰকাশ কৰিছে শেহতীয়াকৈ টিকেট-বঞ্চিত বিজেপি সাংসদজনে। “যদি অনুমতি নাই, তেনেহ’লে এই স্থানান্তৰ সন্দেহজনক,” শৰ্মাৰ মত।

তেজপুৰৰ পৰা আমিনগাঁৱলৈ “মাত্ৰ তিনি ঘণ্টাৰ” ৰাষ্টাত ৰাতি এক বজাত ই ভি এম অনা আৰু তাক ব্যক্তিগত প্ৰতিষ্ঠানত জমা কৰাটোতো সন্দেহ প্ৰকাশ কৰে সাংসদজনে।

তেওঁ লগতে এই ঘটনাটোৰ তদন্তৰো দাবী জনাইছে। এইক্ষেত্ৰত গুৱাহাটী আৰু তেজপুৰৰ প্ৰিজাইডিং অফিচাৰৰ লগতে ৰাজ্যৰ মুখ্য নিৰ্বাচনী বিষয়াই সমগ্ৰ ঘটনাৰ বাবে ৰাইজক উত্তৰ দিব লাগিব, শৰ্মাই মন্তব্য।

তেওঁক বিজেপিয়ে চলিত সাধাৰণ নিৰ্বাচনত টিকেট নিদিয়াটোৱে অসমৰ পৰা দাৰ্জিলিঙলৈকে প্ৰভাৱ পেলাইছে বুলি সাংসদ শৰ্মাই দাবী কৰে।

“তেজপুৰ সমষ্টি যথেষ্ট স্পৰ্শকাতৰ। বিশেষকৈ আৰ পি শৰ্মাক টিকট নিদিয়াৰ পাছত এই সমষ্টি অধিক স্পৰ্শকাতৰ হৈ পৰিছে আৰু ইয়াৰ প্ৰভাৱ সমগ্ৰ উত্তৰ-পূবৰ উপৰিও দাৰ্জিলিঙলৈকে পৰিছে,” শৰ্মাৰ মত।

যোৱা ২৮ এপ্ৰিলৰ নিশা তেজপুৰৰ পৰা দুই শতাধিক ই ভি এম আৰু ভি ভি পি এ টি মেচিন আনি আমিনগাঁৱৰ এটা ব্যক্তিগত গুদামত জমা কৰা হৈছিল।