ছিৰাজুল আলম লস্কৰ বিজেপিলৈ

শিলচৰ লোকসভা সমষ্টিৰ ভোটগ্ৰহণলৈ মাত্ৰ কেইটামান দিন থকা অৱস্থাত শুকুৰবাৰে বিজেপিত যোগদান কৰিছে কাছাৰ জিলা কংগ্ৰেছৰ প্রশাসনিক সাধাৰণ সম্পাদক ছিৰাজুল আলম লস্কৰে।

বিজেপিৰ ইটাখোলাস্তিত কাৰ্য্যালয়ত কংগ্ৰেছ নেতাজনক গেৰুৱা শিবিৰলৈ আদৰে দলটোৰ ৰাজ্যিক সভাপতি ৰঞ্জিত দাসে।

কংগ্ৰেছৰ পৰা সংখ্যালঘুৰ কোনো কাম নোহোৱা বুলি অভিযোগ তুলি ছিৰাউলে কয় যে তেওঁ মোদীৰদ্বাৰা অনুপ্ৰাণিত হৈ গেৰুৱা দলটোত যোগদান কৰিছে।

তাৎপৰ্য্যপূৰ্ণভাৱে “ছিৰাজুল আলম লস্কৰ”ৰ নামত থকা ফে’চবুক একাউণ্টটোৰ পৰা যোৱা ৬ এপ্ৰিললৈকে কংগ্ৰেছ, ৰাহুল গান্ধী আৰু শিলচৰৰ কংগ্ৰেছ প্ৰাৰ্থী সুস্মিতা দেবৰ সমৰ্থনত বিভিন্ন প’স্ত কৰা হৈছিল।

নিৰ্বাচনলৈ মাজত মাত্ৰ ১০দিন থকা অৱস্থাত কংগ্ৰেছ নেতাজনৰ বিজেপি গমনে সুস্মিতা দেবৰ ক্ষতি কৰিব বুলি গেৰুৱা শিবিৰে দাবী কৰিছে যদিও ইয়াক শুভ সংবাদ বুলিহে মন্তব্য কৰিছে কংগ্ৰেছে।

ছিৰাজুলৰ বিজেপিত যোগদান অনুষ্ঠানত সভাপতি দাসৰ লগতে বিজেপিৰ জিলা সভাপতি কৌশিক ৰয় আৰু সোনাই সমষ্টিৰ বিধায়ক আমিনুল হক লস্কৰ আদি নেতাও উপস্থিত আছিল।