দুৰ্ঘটনাত দুয়োখন ভৰি অকামিলা হোৱা এজন যুৱকৰ কৰুণ কাহিনী; সহায়ৰ প্ৰয়োজন
দুৰ্ঘটনাত পতিত হৈ দুয়োখন ভৰি অকামিলা হোৱা এজন যুৱকৰ কৰুণ কাহিনী। চাৰিবছৰ ধৰি চুচৰি চুচৰি কাম কৰি জীৱন কটাইছে শিৱসাগৰৰ কালুগাঁও অঞ্চলৰ জাপিসজিয়া গাঁৱৰ ভবেন গগৈয়ে।
ৰাজমিস্ত্ৰীৰ লগত যুগালি কৰি পত্নী কন্যাৰ সতে সুখী জীৱন অতিবাহিত কৰা ভবেন গগৈৰ পৰিয়াললৈ ২০১৬ চনৰ কোনো এক দিনত নামি আহে কাল অমানিশা।
কাম কৰি থকা অৱস্থাত চাদৰ পৰা পৰি ককাঁলত গুৰুত্বৰভাৱে আঘাত পোৱা ভবেন গগৈয়ে সেই সময়ত টকাৰ অভাৱত উন্নত চিকিৎসা কৰিব নোৱাৰিলে। যাৰবাবে থিয় হ’ব নোৱাৰি তেওঁ ঘৰতে শুই থাকিব লগীয়া হয়।
দীৰ্ঘদিন বিনা চিকিৎসাই এইদৰে থকাৰ বাবে তেওঁৰ ভৰি দুটাও অকামিলা হৈ পৰে। ইপিনে যোৱা এবছৰৰ পূৰ্বে ভবেনৰ পত্নীয়ে কন্যাক লৈ মাকৰ ঘৰলৈ গুচি যায়।
এতিয়া অকলশৰীয়া ভবেনে চুচৰি চুচৰি সকলো কাম কৰাৰ লগতে বাঁহৰ বিভিন্ন সামগ্ৰী বনাই সেইবিলাক বিক্ৰী কৰি জীৱন নিৰ্বাহ কৰি আহিছে।
এনেদৰে চুচৰি চুচৰি নিজৰ সকলো কাম কৰা ভবেনৰ কঁকালৰ তলৰ অংশত ঘা লাগি গৈছে।
ভবেন বৰুৱাৰ এই কৰুণ কাহিনীৰ কথা বিদ্যুৎ বিভাগৰ বিল বিতৰণ কৰা এজন কৰ্মীয়ে জানিব পাৰি সামাজিক মাধ্যমত প্ৰচাৰ কৰাত সমাজৰ বহু ব্যক্তি তেওঁক সহায় কৰিবলৈ ওলাই আহে।
শিৱসাগৰৰ যুৱ ব্যৱসায়ী পৰিক্ষিত বৰুৱাই আজি ৪০ দিনৰ খাদ্য সামগ্ৰীৰ লগতে অত্যাৱশ্যকীয় সামগ্ৰী প্ৰদান কৰে ভবেন গগৈক।
আনহাতে ডিব্ৰুগড়ৰ ‘স্মাইল’ নামৰ এটা NGO-ই ভবেন গগৈলৈ এখন হুইল চেয়াৰ আগবঢ়াব বুলি জানিবলৈ দিয়ে।
কোনো সদাশয় ব্যক্তিয়ে ইচ্ছা কৰিলে অসম গ্ৰামীণ বিকাশ বেংকৰ একাউণ্ট নম্বৰ 7178026003293, IFSC: UTBIORRBAGB-ত আৰ্থিক বৰঙণি আগবঢ়াই ভবেনক সহায় কৰিব পাৰে।