জিঘাংসু প্ৰতিশোধ: এটা চৰৰ প্ৰতিশোধ ল’বলৈয়ে এবছৰীয়া কন্যা শিশুক পানীত পেলাই হত্যা

প্ৰতিশোধৰ তাড়নাই মানুহক কেনে পৰ্যায়ৰ হিংসুক কৰি তুলিব পাৰে তাৰ এক ভয়াৱহ প্ৰমাণে হতচকিত কৰি তুলিছে শেহতীয়া এক হত্যাকাণ্ডই। মাত্ৰ এটা চৰৰ প্ৰতিশোধ ল’বলৈয়ে এবছৰীয়া এটি কন্যা শিশুক হত্যা কৰিছে এজন ১৩ বছৰীয়া কিশোৰে। এই ভয়াৱহ ঘটনা সংঘটিত হৈছে লক্ষ্ণৌত।

দুদিন পূৰ্বে স্থানীয় এখন বিদ্যালয়ৰ পুখুৰীৰ পৰা উদ্ধাৰ কৰা হৈছিল শিশুটিৰ মৃতদেহ। শিশুটিৰ পৰিয়ালৰ সন্দেহৰ ভিত্তিত আৰক্ষীয়ে চুবুৰীয়া কিশোৰটিক সোধা-পোচা কৰে। আৰক্ষীৰ জেৰাত কিশোৰটিয়ে নিজৰ অপৰাধ স্বীকাৰ কৰে।

কিশোৰটিৰ স্বীকাৰোক্তিয়ে স্তম্ভিত কৰি তুলিছে সকলোকে। আৰক্ষীৰ সন্মুখত কিশোৰটিয়ে দিয়া ভাষ্য অনুসৰি হত্যাৰ দিনা কিশোৰটিয়ে কন্যা শিশুটিক ঘৰৰ বাহিৰত অকলশৰীয়াকৈ দেখা পাই বিদ্যালয়ৰ ফালে লৈ আহে। ইয়াৰ পিছতে শিশুটিৰ দুয়োটা ভৰিত দুটা ইটা বান্ধি পুখুৰীত পেলাই দিয়ে শিশুটিক।

হত্যাৰ কাৰণ ব্যক্ত কৰি কিশোৰটিয়ে কয় যে শিশুটিৰ পিতৃয়ে কিছুদিন পূৰ্বে সকলোৰে সন্মুখত অপদস্থ কৰাৰ লগতে এটা চৰ শোধাইছিল। এই অপমানৰ প্ৰতিশোধ ল’বলৈয়ে ১৩ বছৰীয়া কিশোৰটিয়ে এই চৰম জিঘাংসামূলক পন্থা লয়।

আনহাতে এই সন্দৰ্ভত আলিগঞ্জ অঞ্চলৰ অতিৰিক্ত আৰক্ষী আয়ুক্ত চৈয়দ আলী আব্বাছে কয়, “দুদিন পূৰ্বে এখন বিদ্যালয়ৰ পুখুৰীৰ পৰা শিশুটোৰ মৃতদেহ উদ্ধাৰ কৰা হৈছিল। শিশুটিৰ পৰিয়ালৰ সন্দেহৰ ভিত্তিত স্থানীয় এটি কিশোৰক সোধা-পোছা কৰা হৈছিল। তেতিয়াই তেওঁ এই সকলো দোষ স্বীকাৰ কৰিছিল।”

আনহাতে আৰক্ষীয়ে এই হত্যাকাণ্ডত আন কোনো জড়িত আছে নেকি সেই সন্দৰ্ভতো অনুসন্ধান কৰি আছে যদিও তেনে তথ্য লাভ কৰা নাই। হত্যাকাৰী কিশোৰটিৰ বিৰুদ্ধে হত্যা, অপহৰণ আৰু প্ৰমাণ ধ্বংসৰ গোচৰ ৰুজু কৰা হৈছে।

ইতিমধ্যে কিশোৰটিক আদালতত হাজিৰ কৰা হৈছে। আদালতৰ পৰামৰ্শ অনুসৰি হত্যাকাৰী কিশোৰজনৰ মানসিক স্বাস্থ্যৰ পৰীক্ষাৰ বাবে মনোৰোগ বিশেষজ্ঞৰ ওচৰলৈ প্ৰেৰণ কৰা হৈছে।