কৰ’নাৰ হটস্পটত পৰিণত দেশৰ এইখন পঞ্চতাৰকা হোটেল; আক্ৰান্ত হৈছে ৮৫জন লোক

দেশত কৰ’নাৰ আতংক এতিয়াও শেষ হোৱা নাই। এইবাৰ কৰ’নাৰ হটস্পটত পৰিণত হৈছে তামিলনাডুৰ এখন পঞ্চতাৰকাযুক্ত হোটেল।

হোটেলখনত ইতিমধ্যে ৮৫জন লোক কৰ’নাত আক্ৰান্ত হিচাপেচিনাক্ত কৰা হৈছে।

চেন্নাইৰ সমীপৰ গিন্দিত অৱস্থিতি আইটিচি গ্ৰেণ্ড চ’ল নামৰ পঞ্চতাৰকাযুক্ত হোটেলখনত সংঘটিত হৈছে এই ঘটনা।

শনিবাৰে তামিলনাডুৰ স্বাস্থ্যসচিব জে ৰাধাকৃষ্ণনে জানিবলৈ দিয়ে যে হোটেল আইটিচি গ্ৰেণ্ড চ’লত হোটেলখনৰ কৰ্মীকে ধৰি মুঠ ৮৫জন লোক কৰ’নাত আক্ৰান্ত হোৱাৰ খৱৰ পোৱা গৈছে।

হোটেলখনত যোৱা ১৫ ডিচেম্বৰত এজন কৰ্মীৰ শৰীৰত কৰ’না ভাইৰাছৰ উপস্থিতি ধৰা পৰিছিল। ইয়াৰ পাছতে মুঠ ৬০৯জনৰ নমুনা সংগ্ৰহ কৰি পৰীক্ষা কৰাৰ পাছত ৮৫জনৰ ফলাফল পজিটিভ আহে।

এই ঘটনাৰ পাছতে চেন্নাই পৌৰসভাক হোটেলসমূহত থকা আৱাসীসকলৰ নমুনা পৰীক্ষা কৰাৰ নিৰ্দেশ দিয়া হৈছে। চহৰখনৰ সকলো হোটেলকে চৰকাৰী কোভিড বিধি মানি চলাৰ বাবে কঠোৰ নিৰ্দেশনা দিয়া হৈছে।

উল্লেখ্য যে যোৱা ডিচেম্বৰত আইআইটি মাদ্ৰাজৰ ২০০জন শিক্ষাৰ্থীৰ দেহত কৰ’না ভাইৰাছৰ উপস্থিতি ধৰা পৰাৰ পাছত পুনৰ একেলগে চেন্নাইৰ ইমান জনকৈ লোক আক্ৰান্ত হোৱাৰ ঘটনা ঘটিছে।