বিড়ম্বনা! ‘ভাৰত জোড়ো যাত্ৰা’ত অংশগ্ৰহণ কৰি চাকৰি হেৰুৱালে শিক্ষকে

দলীয় সংকট মোচনৰ বাবে শীৰ্ষ নেতা ৰাহুল গান্ধীৰ নেতৃত্বত অব্যাহত আছে কংগ্ৰেছৰ ভাৰত জোড়ো যাত্ৰা। এই অভিলাষী কাৰ্যসূচীয়ে ইতিমধ্যে জনসাধাৰণৰ ব্যাপক সমৰ্থন লাভ কৰিছে। পিছে কংগ্ৰেছ দল ৰাজনৈতিকভাৱে লাভান্বিত হ’লেও এই কাৰ্যসূচীত অংশগ্ৰহণ কৰি বিপদৰ সন্মুখীন হৈছে এগৰাকী শিক্ষক।

মধ্য প্ৰদেশৰ বৰুৱানী জিলাত ৰাহুল গান্ধী নেতৃত্বাধীন ভাৰত জোড়ো যাত্ৰাত অংশগ্ৰহণ কৰাৰ বাবে চৰকাৰী বিদ্যালয়ৰ এগৰাকী শিক্ষক নিলম্বনৰ সন্মুখীন হৈছে। আজি ৰাজ্যখনৰ এগৰাকী প্ৰশাসনিক বিষয়াই শিক্ষকগৰাকীৰ বিৰুদ্ধে গ্ৰহণ কৰা এই শাস্তিমূলক ব্যৱস্থাৰ বিষয়ে প্ৰকাশ কৰিছে।

ৰাজ্যৰ জনজাতি পৰিক্ৰমা বিভাগৰ অধীনস্থ কানাছিয়াত ৰাজেশ কাননোজ নামৰ এগৰাকী প্ৰাথমিক বিদ্যালয়ৰ শিক্ষকে ভাৰত জোড়ো যাত্ৰাত অংশগ্ৰহণ কৰাৰ এদিন পিছতে যোৱা ২৫ নৱেম্বৰত নিলম্বন কৰা হৈছিল।

সামাজিক মাধ্যমত তেওঁৰ নিলম্বনৰ নিৰ্দেশনা প্ৰকাশ পোৱাৰ পিছতে এই বিষয়টো পোহৰলৈ আহে। জনজাতি পৰিক্ৰমা বিভাগৰ সহকাৰী আয়ুক্ত এন এছ ৰঘুবংশীয়ে কয়, “সেৱা আচৰণৰ নিয়ম উলংঘা কৰি ৰাজনৈতিক সভাত অংশগ্ৰহণ কৰাৰ বাবে কাননোজক নিলম্বন কৰা হৈছে।”

বিষয়াগৰাকীয়ে লগতে উল্লেখ কৰা মতে ৰাজেশ কাননোজে গুৰুত্বপূৰ্ণ কাম থকা বুলি ছুটীৰ আবেদন কৰিছিল, কিন্তু ৰাজনৈতিক অনুষ্ঠানত অংশগ্ৰহণ কৰাৰ পিছত তেওঁ ছ’চিয়েল মিডিয়াত ফটো পোষ্ট কৰিছিল।

ইফালে, শিক্ষকগৰাকীৰ নিলম্বনৰ পাছতে ৰাজ্যিক কংগ্ৰেছৰ সংবাদ মাধ্যম বিভাগৰ অধ্যক্ষ কে কে মিশ্ৰই এক টুইটযোগে ৰাজ্যখনৰ শাসনাধিষ্ঠ বিজেপি চৰকাৰে বৈষম্যমূলক আচৰণ কৰাৰ অভিযোগ তুলি সমালোচনা কৰে।

শিৱৰাজ সিং চৌহান চৰকাৰে কৰ্মচাৰীক ৰাষ্ট্ৰীয় স্বয়ংসেৱক সংঘৰ শাখত অংশ ল’বলৈ অনুমতি দিছে, কিন্তু এক অৰাজনৈতিক পদযাত্ৰাৰ সময়ত ৰাহুল গান্ধীক ধনু-কাঁড় উপহাৰ দিয়াৰ বাবে ৰাজেশ কান্নোজেক নিলম্বন কৰিছে বুলি অভিযোগ কৰিছে মিশ্ৰই।