ওমানত গ্ৰেপ্তাৰ মহাদেৱ বেটিং এপ কেলেংকাৰিৰ নায়ক সৌৰভ চন্দ্ৰকৰ; দেশলৈ ওভতাই অনাৰ প্ৰস্তুতি ভাৰতৰ

জানিব পৰা মতে, ভাৰতৰ অন্যতম বৃহৎ অনলাইন বেটিং কেলেংকাৰীৰ মূল অভিযুক্ত সৌৰভ চন্দ্ৰকৰক ওমানত গ্ৰেপ্তাৰ কৰা হৈছে। তদন্তকাৰী সংস্থাৰ সূত্ৰ অনুসৰি জুন মাহৰ শেষ সপ্তাহত ওমান আৰক্ষীয়ে তেওঁক গ্ৰেপ্তাৰ কৰিছে।

ভাৰত চৰকাৰে এতিয়া তেওঁক ভাৰতলৈ ঘূৰাই অনাৰ বাবে প্ৰত্যাৰ্পণ প্ৰক্ৰিয়া আৰম্ভ কৰিছে। তদন্তকাৰীসকলে ধাৰণা কৰে যে দীৰ্ঘদিন ধৰি পলাতক হৈ থকা সৌৰভক দেশলৈ ঘূৰাই অনা হ’লে মহাদেৱ অনলাইন বেটিং গোচৰৰ তদন্তত এক বৃহৎ অগ্ৰগতি হ’ব পাৰে।

সূত্ৰ অনুসৰি ভাৰতীয় তদন্তকাৰী সংস্থাৰ অনুৰোধত ইন্টাৰপলে জাৰি কৰা ৰেড নোটিচৰ ভিত্তিত ওমানৰ ৰয়েল পুলিচে সৌৰভ চন্দ্ৰকৰক গ্ৰেপ্তাৰ কৰে। অৱশ্যে ভাৰতীয় সংস্থাসমূহে চৰকাৰী পর্যায়ত এই তথ্য সম্পূর্ণ নিশ্চিতকৰণৰ বাবে অপেক্ষা কৰি আছে৷

প্ৰাথমিক তদন্তত সৌৰভ চন্দ্ৰকৰে দক্ষিণ-পূব এছিয়াৰ এখন দেশৰ ভুৱা পাছপ’ৰ্ট ব্যৱহাৰ কৰি ওমানত প্ৰৱেশ কৰাৰ সন্দেহ প্ৰকাশ কৰা হৈছে। ভাৰত আৰু ওমানৰ মাজত প্ৰত্যাৰ্পণ চুক্তি থকাৰ বাবে তেওঁক শীঘ্ৰে ভাৰতলৈ আনিব পৰা হ’ব বুলি কেন্দ্ৰীয় তদন্তকাৰী সংস্থাসমূহ আশাবাদী।

২০১৯ চনৰ পৰা পলাতক হৈ থকা সৌৰভ চন্দ্ৰকৰৰ বিৰুদ্ধে ৰবি উপ্পলৰ সৈতে ‘মহাদেৱ’ নামৰ এটা বিশাল অনলাইন বেটিং নেটৱৰ্ক গঢ়ি তোলাৰ অভিযোগ উত্থাপন হৈছে। সেই বছৰতে দুয়োজনে সংযুক্ত আৰব আমিৰশ্বাহীৰ ডুবাইলৈ পলায়ন কৰে। তদন্তকাৰীয়ে দাবী কৰিছে যে এই বেটিং চক্ৰৰ এটা বৃহৎ অংশ এতিয়াও তাৰ পৰাই চলি আছে।

ইয়াৰ পূৰ্বে ২০২৪ চনত সংযুক্ত আৰব আমিৰশ্বাহীৰ ডুবাইত ইন্টাৰপল ৰেড নোটিচৰ ভিত্তিত সৌৰভক গ্ৰেপ্তাৰ কৰা হৈছিল। পিছত তেওঁক গৃহবন্দী কৰি ৰখা হৈছিল যদিও ভাৰতৰ প্ৰত্যাৰ্পণৰ অনুৰোধ অৱশেষত সফল নহ’ল। ফলত তেওঁক মুকলি কৰি দিয়া হয়। একেদৰে তেওঁৰ সহযোগী ৰবি উপ্পলৰ বিৰুদ্ধেও প্ৰত্যাৰ্পণৰ প্ৰক্ৰিয়া আৰম্ভ কৰা হৈছিল যদিও শেষলৈকে আগনাবাঢ়িল। পিছত তেওঁ নিৰুদ্দেশ হোৱা বুলি তদন্তকাৰীয়ে দাবী কৰে।

মহাদেৱ অনলাইন বেটিং এপ কেলেংকাৰীৰ তদন্ত কৰিছে কেন্দ্ৰীয় তদন্তকাৰী ব্যুৰো (চিবিআই), বলবৎকাৰী সঞ্চালকালয় (ইডি) আৰু ছত্তীশগড় আৰক্ষীয়ে। তদন্তত প্ৰকাশ পাইছে যে এই চক্ৰৰ জৰিয়তে অনলাইনত পকাৰ, কাৰ্ড গেম, ক্ৰিকেট, ফুটবল, টেনিছ, বেডমিণ্টন আনকি বিভিন্ন নিৰ্বাচনৰ ফলাফলৰ ওপৰতো অবৈধ বাজিৰ ধৰা হৈছিল।

ইডিৰ চাৰ্জ শ্বীটৰ মতে, এই বেটিং চক্ৰটোৱে সমগ্ৰ দেশতে কমেও ৩,২০০টা বেটিং পেনেলৰ জৰিয়তে কাম কৰিছিল। তদন্তত দাবী কৰা হৈছে যে দৈনিক প্ৰায় ২৪০ কোটি টকাৰ লেনদেন হৈছিল। ইয়াৰ উপৰিও অভিযোগ কৰা হৈছে যে এই ব্যৱসায় চলাবলৈ ডুবাইত প্ৰায় ২০টা ভিলা ভাড়াত লোৱা হৈছিল, য’ত প্ৰায় ৩৫০০ কৰ্মচাৰীয়ে কাম কৰিছিল।

এই গোচৰৰ তদন্তত চত্তীশগড়ৰ প্ৰাক্তন মুখ্যমন্ত্ৰী ভূপেশ বাঘেলৰ নামো ওলাইছে। অৱশ্যে তেওঁৰ বিৰুদ্ধে উত্থাপিত অভিযোগ বাঘেলে অস্বীকাৰ কৰিছে। তদন্তকাৰীৰ মতে, যদি সৌৰভ চন্দ্ৰকৰক ভাৰতলৈ ঘূৰাই অনা হয়, তেন্তে এই বহু চৰ্চিত বেটিং কেলেংকাৰীৰ বিত্তীয় লেনদেন, আন্তঃৰাষ্ট্ৰীয় যোগাযোগ আৰু ইয়াৰ সৈতে জড়িত প্ৰভাৱশালী লোকৰ ভূমিকা সম্পৰ্কে অধিক গুৰুত্বপূৰ্ণ তথ্য পোহৰলৈ আহিব পাৰে।