ইৰানৰ পাৰমাণৱিক ঘাটিত আমেৰিকাৰ ভয়ংকৰ আক্ৰমণ, তেজষ্ক্ৰিয় বিকিৰণৰ আশংকাত হুৱাদুৱা

আমেৰিকাই ইৰানৰ বুশ্বেহৰ পাৰমাণৱিক ঘাটিৰ ওচৰত এক ভয়ংকৰ আক্ৰমণ চলাইছে বুলি ইৰানৰ সংবাদ মাধ্যমে দাবী কৰিছে। এই খবৰ পোহৰলৈ অহাৰ পিছতে সমগ্ৰ বিশ্বতে তীব্ৰ চাঞ্চল্যৰ সৃষ্টি হৈছে। ইৰানৰ সংবাদ মাধ্যম আল মেহৰ নিউজৰ প্ৰতিবেদন অনুসৰি বৃহস্পতিবাৰে দুপৰীয়া বুশ্বেহৰ পাৰমাণৱিক ঘাটিৰ ওচৰত আমেৰিকান সেনাই এটাৰ পিছত এটাকৈ গোলাবৰ্ষণ কৰে। ইয়াৰ ফলত সমগ্ৰ অঞ্চলটোত জুই লাগি যায় আৰু ক’লা ধোঁৱাই আকাশ ছানি ধৰে।

প্ৰথম অৱস্থাত এই খবৰটো অস্বীকাৰ কৰা হৈছিল যদিও পিছত ইৰান চৰকাৰে এই কথা স্বীকাৰ কৰে। ইৰানৰ চৰকাৰী মুখপত্ৰ আইআৰএনএত নিশ্চিত কৰা হৈছে যে বুশ্বেহৰ পাৰমাণৱিক ঘাটিৰ ওচৰত আমেৰিকাই মিছাইল আক্ৰমণ চলাইছে। অৱশ্যে ইৰানৰ তৰফৰ পৰা জনোৱা হৈছে যে এই আক্ৰমণৰ ফলত কোনো তেজষ্ক্ৰিয় বিকিৰণ বিয়পি পৰা নাই আৰু সেই অঞ্চলৰ তেজষ্ক্ৰিয়তাৰ মাত্ৰা সম্পূৰ্ণ স্বাভাৱিক হৈ আছে। ২০১১ চনৰ পৰা কাৰ্যক্ষম হোৱা এই বুশ্বেহৰ পাৰমাণৱিক কেন্দ্ৰটোৱে দেশখনৰ লাখ লাখ ঘৰলৈ বিদ্যুৎ যোগান ধৰি আহিছে।

আমেৰিকাৰ ৰাষ্ট্ৰপতি ডোনাল্ড ট্ৰাম্পৰ ভাবুকিৰ পিছতে বুধবাৰে গভীৰ নিশা আমেৰিকাই ইৰানৰ ওপৰত এই বৃহৎ আক্ৰমণ চলায়। ইৰানচহৰত থকা ইৰানৰ এটা বিমান ঘাটিও এই আমেৰিকান আক্ৰমণৰ বলি হোৱা বুলি জানিব পৰা গৈছে। এই আক্ৰমণৰ ফলত হোৱা ভয়ংকৰ বিস্ফোৰণত ইৰানৰ ৰাজধানী তেহৰান আৰু বন্দৰ আব্বাছকে ধৰি কেইবাখনো প্ৰধান চহৰ কঁপি উঠে। অৱশ্যে এই আক্ৰমণত বৰ্তমানলৈকে কোনো লোক হতাহত হোৱাৰ খবৰ পোৱা নাই। আমেৰিকাৰ চেন্ট্ৰেল কমাণ্ডে এটা বিবৃতিত প্ৰকাশ কৰিছে যে ইৰানে হৰমুজ প্ৰণালীত জাহাজ চলাচলৰ স্বাধীনতাত বাধাৰ সৃষ্টি কৰিছিল আৰু সেই বাবেই আমেৰিকান সেনাই ইৰানত এই সামৰিক অভিযান চলাইছে। এই অভিযানৰ পিছতে ডোনাল্ড ট্ৰাম্পে কেইবাটাও ছবি আৰু ভিডিঅ’ প্ৰকাশ কৰি দাবী কৰিছে যে ৱাশ্বিংটনে ইৰানৰ ওপৰত ২০ গুণ বেছি শক্তিশালী আঘাত হানিছে।