ক’ৰ’না ভাইৰাছৰ কৱলত পৰা কেবিনেট মন্ত্ৰীক চিকিৎসালয়ত ভৰ্তি
মহাৰাষ্ট্ৰত দ্ৰুত গতিত বৃদ্ধি পাবলৈ ধৰিছে ক’ৰ’না আক্ৰান্তৰ সংখ্যা। শেহতীয়া খবৰ অনুসৰি ৰাষ্ট্ৰবাদী কংগ্ৰেছ পাৰ্টিৰ এগৰাকী জ্যেষ্ঠ নেতা তথা ৰাজ্যখনৰ কেবিনেট মন্ত্ৰী কোভিদ-১৯ত আক্ৰান্ত হৈছে।
সুৰক্ষাকৰ্মী আৰু নিকটৱৰ্তী লোক কেইজনমান কোভিদ-১৯ত আক্ৰান্ত হোৱাৰ পিছতে ১৩ এপ্ৰিলৰ পৰা মন্ত্ৰী গৰাকীয়ে নিজকে কোৱাৰেণ্টাইন কৰিছিল।
১৩ এপ্ৰিলত কৰা পৰীক্ষাত মন্ত্ৰী গৰাকীৰ ৰিপ’ৰ্ট নিগেটিভ আহিছিল যদিও বৰ্তমান তেওঁ উশাহ লোৱাত যথেষ্ট কষ্ট পোৱা বাবেই চিকিৎসালয়ত ভৰ্তি হৈছে।
মন্ত্ৰী গৰাকী বৰ্তমান এখন ব্যক্তিগত চিকিৎসালয়ত চিকিৎসা গ্ৰহণ কৰি আছে।
উল্লেখ্য যে তেওঁৰ দেহৰক্ষী আৰু ৰান্ধনিসহ মুঠ ১৬ গৰাকী লোক ক’ৰ’নাত আক্ৰান্ত হৈছে।
ইফালে মহাৰাষ্ট্ৰত এই পৰ্যন্ত ৬৪২৭ গৰাকী লোক ক’ৰ’নাত আক্ৰান্ত হৈছে আৰু ইয়াৰ ফলত মৃত্যুমুখত পৰিছে ২৮৩ গৰাকী লোক।
আনহাতে কেন্দ্ৰীয় মন্ত্ৰী ৰামদাস আঠবলেৰ ঘৰৰ বাহিৰত নিয়োজিত ছিকিউৰিটি গাৰ্ডো ক’ৰ’নাত আক্ৰান্ত হৈ চিকিৎসাধীন হৈ আছে।
চিন্তনীয় বিষয় এইটোৱে যে, ইতিমধ্যে দেশত আক্ৰান্তৰ সংখ্যা ২৩ হাজাৰ অতিক্ৰম কৰাৰ বিপৰীতে ৭১৮ গৰাকী লোকৰ মৃত্যু হৈছে।