মে’জৰ লিতুল গগৈ দোষী সাব্যস্ত, সন্মুখীন হ’ব পাৰে ক’ৰ্ট মাৰ্শ্বালৰো

এগৰাকী কাশ্মীৰী যুৱতীৰ সৈতে শ্ৰীনগৰৰ এখন হ’টেলত দেখাক লৈ উঠা অভিযোগত ক’ৰ্ট অৱ এনকুৱাৰিয়ে দোষী সাব্যস্ত কৰাৰ পিছত সেনাবাহিনীৰ শাস্তিৰ সন্মুখীন হোৱা অসম সন্তান মে’জৰ লিতুল গগৈ সন্মুখীন হ’ব লগা হ’ব পাৰে ক’ৰ্ট মাৰ্শ্বালৰো।

গগৈক ৫৩ ৰাষ্ট্ৰীয় ৰাইফলছৰ বুদগামতস্থিত শিবিৰৰ পৰা আঁতৰাই অৱন্তীপৰাস্থিত সেনাৰ ভিক্টৰ ফ’ৰ্চ মুখ্য কাৰ্য্যালয়লৈ বদলি কৰা হৈছে। সেনাবাহিনীৰ সূত্ৰৰ উদ্ধৃতিৰে মঙলবাৰে টাইমছ অৱ ইন্দিয়া-ৰ বাতৰিত প্ৰকাশ।

কিন্তু অনুশাসনমূলক ব্যৱস্থাতে মে’জৰ গগৈৰ শাস্তি শেষ নহৈ তেওঁ আনকি সেনাৰ ক’ৰ্ট মাশ্বালৰ সন্মুখীনো হ’ব লগা হ’ব পাৰে।

স্থানীয় লোকৰ সৈতে ‘বন্ধুত্ব কৰা’ আৰু ‘কৰ্মৰত অঞ্চলত কৰ্তব্যৰ স্থানৰ পৰা আঁতৰি থকা’—এই দুই কাৰণত গগৈক সেনাৰ ক’ৰ্ট অৱ এনকুৱাৰিয়ে যোৱা মাহত দোষী সাব্যস্ত কৰিছিল।

টাইমছ অৱ ইণ্দিয়া-ৰ বাতৰি অনুসৰি সেনাৰ ক’ৰ্ট অৱ এনকুৱাৰিয়ে মে’জৰ গগৈক দোষী সাব্যস্ত কৰাৰ লগতে তেওঁৰ বিৰুদ্ধে ‘প্ৰমাণৰ সাৰাংশ’ (Summary of Evidence)ৰ পৰামৰ্শ দিছে, যিটো সামৰিক আইনত ক’ৰ্ট মাৰ্শ্বালৰ পূৰ্বৰ ব্যৱস্থা।

সেনাবাহিনীৰ উচ্চ পদস্থ বিষয়াই যুগুতাব লগা এই ‘প্ৰমাণৰ সাৰাংশ’ই গগৈয়ে ক’ৰ্ট মাৰ্শ্বালৰ সন্মুখীন হোৱা নোহোৱাটো নিৰ্ধাৰণ কৰিব।

মে’জৰ গগৈ দোষী সাব্যস্ত হ’লে তেওঁৰ ওপৰত সামৰিক আইন অনুসৰি কঠোৰ শাস্তিবিধানৰ ঘোষণা কৰিছিল সেনা প্ৰধান বিপিন ৰাৱতে।

২০১৭ চনৰ ৯ এপ্ৰিলত কাশ্মীৰৰ এজন যুৱকক সেনাৰ জীপৰ আগত বান্ধি নিয়াৰ ঘটনাক লৈ মে’জৰ গগৈ দেশজুৰি বিতৰ্কৰ কেন্দ্ৰবিন্দুত পৰিণত হৈছিল।