ধনৰ বিনিময়ত NEET ত বহু শিক্ষাৰ্থীয়ে লাভ কৰিছিল বেছি নম্বৰ! চিবিআইৰ তদন্তত ওলাল জোলোঙাৰ মেকুৰী

মেডিকেল পাঠ্যক্ৰমত নামভৰ্তিৰ সৰ্বভাৰতীয় প্ৰৱেশ পৰীক্ষা NEET ত সংঘটিত হোৱা দুৰ্নীতিয়ে এতিয়া জোকাৰি গৈছে সমগ্ৰ দেশকে।

NEET ত বৃহৎ পৰিমাণৰ ধনৰ বিনিময়ত একাংশ শিক্ষাৰ্থীক ভাল নম্বৰ দিয়াৰ কথা পোহৰলৈ অহাৰ পিছতে বিষয়টোকলৈ প্ৰতিক্ৰিয়াৰ সৃষ্টি হৈছে।

কেন্দ্ৰীয় তদন্তকাৰী সংস্থা চিবিআই-এ চলোৱা তদন্তত এই বৃহৎ কেলেংকাৰীৰ তথ্য পোহৰলৈ আহিছে। চিবিআইৰ তদন্তত প্ৰকাশ পোৱা মতে ৫০ লাখকৈ টকালৈ বহু শিক্ষাৰ্থীক NEET ত ভাল নম্বৰ দিয়িা হৈছিল।

এই কেলেংকাৰীৰ অভিকেন্দ্ৰ হিচাবে পৰিগণিত হোৱা মহাৰাষ্ট্ৰৰ আৰ কে এডুকেছন কেৰিয়াৰ গাইডেন্স নামৰ কোচিং চেণ্টাৰটোৰ কেইবাজনো লোকক ইতিমধ্যে গ্ৰেপ্তাৰ কৰা হৈছে।

চিবিআইৰ সূত্ৰ এটাই জানিবলৈ দিয়া মতে উক্ত কোচিং চেণ্টাৰটোৱে একাংশ শিক্ষাৰ্থীক NEET ত ভাল নম্বৰ দিয়াৰ বিনিময়ত ধনৰ লেন-দেন কৰিছিল। কোচিং চেণ্টাৰটোৱে ধন লোৱা শিক্ষাৰ্থীসকলক NEET ত নকল কৰাৰ সুবিধা কৰি দিছিল।

বিভিন্ন পৰীক্ষা কেন্দ্ৰ সৈতে কোচিং চেণ্টাৰটোৱে ধনৰ বিনিময়ত সম্পৰ্ক গঢ়ি তুলিছিল আৰু একাংশ শিক্ষাৰ্থীক NEET ত তেনেদৰেই বেছি নম্বৰ পোৱাৰ সুবিধা কৰি দিছিল।

আনকি পৰীক্ষাৰ্থীক নিৰ্দিষ্ট পৰীক্ষা কেন্দ্ৰত পৰীক্ষাত বহিব পৰাৰো ব্যৱস্থা কৰি দিছিল উক্ত কোচিং চেণ্টাৰটোৱে।কোচিং চেণ্টাৰটোৱে আনকি বহু পৰীক্ষাৰ্থীৰ বিপৰীতে ভুৱা পৰীক্ষাৰ্থীৰ জৰিয়তে পৰীক্ষা ব্যৱস্থা কৰাৰ কথাও পোহৰলৈ আহিছে।

চিবিআই- এ এই সমস্ত ঘটনাৰ তদন্ত কৰি কেইবাজনো লোকক গ্ৰেপ্তাৰ কৰিছে।

NEET ৰ দৰে পৰীক্ষাত সংঘটিত এনে দুৰ্নীতিৰ খবৰে এতিয়া বিভিন্ন মহলত ব্যাপক জোকাৰণি তোলা পৰিলক্ষিত হৈছে।

উল্লেখ্য ইয়াৰ পূৰ্বে ইঞ্জিনীয়াৰিঙৰ প্ৰৱেশ পৰীক্ষাতো ব্যাপক জালিয়াতি সংঘটিত হোৱাৰ কথা প্ৰমাণিত হৈছিল।