ডিব্ৰুগড়ত উত্তেজিত চাহ বাগিচাৰ শ্ৰমিকে জীৱন্তে জ্বলাই দিলে শিশু হত্যাকাৰীক

ডিব্ৰুগড়ৰ ৰহমৰিয়া আৰক্ষীৰ চকীৰ অন্তৰ্গত ধলাজান চাহ বাগিচাত শনিবাৰে এটি ৫ বছৰীয়া শিশুক হত্যা কৰাৰ বাবে হত্যাকাৰীজনক উত্তেজিত চাহ বাগিচাৰ একাংশ শ্ৰমিকে জীৱন্তে জ্বলাই দিয়ে।

অভিযুক্ত সুনীত তাঁতী নামৰ লোকজনে উজ্জল মুৰা নামৰ শিশুটিক চুৰিৰে ডিঙি কাটি হত্যা কৰিছিল।

এগৰাকী আৰক্ষী বিষয়াই জানিবলৈ দিয়ে যে “ধলাজান চাহ বাগিচাৰ স্থানীয় লোকে ঘটনাটো জনাৰ পিছত অভিযুক্ত সুনীত তাঁতীক কমেও আধা কিলোমিটাৰ খেদি নিয়ে আৰু তেওঁক জীৱন্তে জ্বলাই দিয়ে।”

লগতে পঢ়ক: বস্ত্ৰ নগৰী শুৱালকুছিত ভাৰতীয় ক্ৰিকেট দলৰ প্ৰাক্তন তাৰকা ইউছুফ পাঠান

আৰক্ষীয়ে ঘটনাস্থলীত উপস্থিত হৈ সমগ্ৰ ঘটনাটোৰ তদন্ত আৰম্ভ কৰিছে।

আৰক্ষী বিষয়াগৰাকীয়ে কয়,”পৰিস্থিতি নিয়ন্ত্ৰণাধীন। ব্যক্তিজন মানসিকভাৱে অস্থিৰ আছিল। আমি আমাৰ তদন্ত আৰম্ভ কৰিছো।”

ইপিনে, ডিব্ৰুগড়ৰ আৰক্ষী অধীক্ষক শ্বেতাংক মিশ্ৰই ঘটনাটো নিশ্চিত কৰিছে আৰু তেওঁলোকে ঘটনাটোৰ তদন্ত আৰম্ভ কৰিছে বুলি জানিবলৈ দিয়ে।

লগতে পঢ়ক: মৰ্মান্তিক! মাতৃৰ নিথৰ দেহৰ কাষত চাৰি দিন কটালে ১০ বছৰীয়া সন্তানে

মিশ্ৰই লগতে কয়, “শনিবাৰে সুনীত তাঁতীৰ ঘৰৰ চৌহদত আন সৰু ল’ৰা-ছোৱালীবোৰৰ সৈতে এই শিশুটিও খেলি আছিল। হঠাতে তাঁতীৰ খং উঠে আৰু শিশু উজ্জল মুৰাক ডিঙি কাটি হত্যা কৰে। আমি মৃতদেহ দুটা মৰণোত্তৰ পৰীক্ষাৰ বাবে প্ৰেৰণ কৰিছো।‘’