ভাৰতীয় ফুটবলত নৱজাগৰণ; প্ৰৱেশ ঘটিল মানচেষ্টাৰ চিটিৰ
ভাৰতীয় ফুটবল জগতত আলোড়ন তুলি উন্মোচিত হ’ল এক নতুন সম্ভাৱনাৰ। বিগত বৰ্ষৰ ইংলিছ প্ৰিমিয়াৰ লীগ বা ইপিএল চেম্পিয়ন মানচেষ্টাৰ চিটিয়ে ভাৰতীয় ফুটবল ক্লাৱ মুম্বাই চিটি এফ চিক ক্ৰয় কৰিবলৈ আগবাঢ়ি আহিল।
ভাৰতীয় ফুটবলৰ বাবে ই এক সাধাৰণ ঘটনা নহয়। ইপিএল খেলা এটা দলে ভাৰতীয় ফুটবল ক্লাৱ এটাৰ স্বত্ব কিনি লোৱাটো এক প্ৰকাৰ আশ্চৰ্য।
বৃহস্পতিবাৰে ইংলিছ প্ৰিমিয়াৰ লীগ খেলা দলটোৱে সদৰী কৰে যে মুম্বাই চিটি এফ চিৰ ৬৫ শতাংশ স্বত্ব এতিয়া তেওঁলোকৰ হাতত।
চিটি ফুটবল গ্ৰুপ চমুকৈ ছিএফজি হৈছে মানচেষ্টাৰ চিটি ক্লাৱৰ দায়িত্বত থকা গ্ৰুপ। চিএফজিৰ দ্বাৰাই মানচেষ্টাৰ চিটি ক্লাৱ নিয়ন্ত্ৰিত হয়।
ইতিমধ্যে এই গ্ৰুপটোৰ নিয়ন্ত্ৰণত আছে সাতটা ক্লাৱ। এইবাৰ ইয়াৰে সৈতে সংযোজিত হ’ল মুম্বাই চিটি এফ চি।
ক্লাৱটোৱে ভাৰতীয় মুদ্ৰা হিচাপত প্ৰায় ৩৬০ কোটি টকা বিনিয়োগ কৰিবলৈ আগবাঢ়িছে। কেবল ধনেই নহয়, মানচেষ্টাৰ চিটিৰ প্ৰশিক্ষকগৰাকীয়ে অৱসৰ সময়ত প্ৰত্যক্ষভাৱে মুম্বাই চিটি এফ চিৰ সৈতে কাম কৰিব।
ইপিনে ক্লাৱটোৰ ৬৫ শতাংশ মালিকী স্বস্ত্ব ক্ৰয় কৰাৰ পাছত বাকী ৩৫ শতাংশ স্বত্ব থাকিব বলীউদ তাৰকা ৰণবীৰ কাপুৰ আৰু তেওঁৰ পাৰ্টনাৰ বিমল পাৰেখৰ হাতত।
ছিএফজিৰ চেয়াৰমেন খালডুন অল মুবাৰকে এটি সাক্ষাৎকাৰত ব্যক্ত কৰে যে ‘’এই বিনিয়োগে ভৱিষ্যতে কেবল মাত্ৰ মুম্বাই চিটি এফ চিকেই আগবঢ়াই নিব তেনে নহয়, ই ভাৰতীয় ফুটবলৰো উন্নতি ঘটাব বুলি আশা কৰিছো।‘’
মানচেষ্টাৰ চিটিৰ এই প্ৰচেষ্টাক আদৰণি জনাইছে আইএছএলৰ চেয়াৰমেন নীতা আম্বানিয়ে।
তেওঁ কয়,’’ভাৰতীয় ফুটবলৰ কাৰণে আজি এক যুগান্তকাৰী দিন। ভাৰতীয় ফুটবল এতিয়া নতুন পথেৰে অগ্ৰসৰ হ’ব। দেশৰ তৰুণসকল ফুটবলৰ প্ৰতি আগ্ৰহী হৈ পৰিব। বিশ্বৰ দৰবাৰত উপনীত হ’ল আমাৰ দেশৰ ফুটবল। ইয়াতকৈ আনন্দৰ কথা আৰু কি হ’ব পাৰে।‘’