শ্ৰীমন্ত শংকৰদেৱৰ জন্মজয়ন্তীক ৰাষ্ট্ৰীয় বন্ধ হিচাপে ঘোষণা কৰক : লোকসভাত মঙলদৈৰ বিজেপি সাংসদ দিলীপ শইকীয়া

মঙলদৈ লোকসভা সমষ্টিৰ বিজেপিৰ সাংসদ দিলীপ শইকীয়াই মহাপুৰুষ শ্ৰীমন্ত শংকৰদেৱৰ জন্মতিথিত ৰাষ্ট্ৰীয় বন্ধ ঘোষণা কৰাৰ বাবে কেন্দ্ৰ চৰকাৰক আহ্বান জনাইছে।

বিজেপিৰ লোকসভাৰ সাংসদগৰাকীয়ে বুধবাৰে সদনৰ শূন্য কালত বিষয়টো উত্থাপন কৰে।

‘‘শ্ৰীমন্ত শংকৰদেৱৰ জন্মতিথিত ৰাষ্ট্ৰীয় বন্ধ ঘোষণা কৰিলে অসমৰ জনসাধাৰণৰ আৱেগ আৰু অনুভূতিক সন্মান জনোৱা হ’ব,’’ শইকীয়াই কয়।

বিজেপিৰ সাংসদ গৰাকীয়ে শ্ৰীমন্ত শংকৰদেৱৰ আদৰ্শ আৰু সামাজিক ন্যায়ক সমগ্ৰ দেশত প্ৰচাৰ কৰাৰ বাবে এটা ফাউণ্ডেশ্যন স্থাপন কৰি বিভিন্ন অনুষ্ঠান আৰু কাম-কাজ কৰাৰ বাবেও দাবী জনায়।

উল্লেখযোগ্য যে, বিগত লোকসভা নিৰ্বাচনত দিলীপ শইকীয়াই মঙলদৈ লোকসভা সমষ্টিত কংগ্ৰেছৰ প্ৰাৰ্থী ভূৱনেশ্বৰ কলিতাক পৰাস্ত কৰি প্ৰথমবাৰৰ বাবে সাংসদ হিচাপে নিৰ্বাচিত হৈছে।

বুধবাৰে লোকসভাৰ মজিয়াত কেন্দ্ৰীয় গৃহ মন্ত্ৰী অমিত শ্বাহে নাগৰিকত্ব সংশোধনী বিধেয়কৰ লগতে ৰাষ্ট্ৰীয় নাগৰিকপঞ্জীৰ প্ৰসংগও উল্লেখ কৰে।

শ্বাহে সমগ্ৰ দেশতে এন আৰ চি প্ৰক্ৰিয়া আৰম্ভ কৰা হ’ব বুলি মন্তব্য কৰে।