যোগদান কৰিয়েই অগপত ‘চাফাই অভিযান’ৰ ঘোষণা মণিমাধৱ মহন্তৰ

প্ৰধান মন্ত্ৰী নৰেন্দ্ৰ মোদীৰ স্বচ্ছ ভাৰতৰ সপোন বাস্তৱত পৰিণত হওক বা নহওক কিন্তু অতি শীঘ্ৰে চিকচিয়া হৈ উঠিব পুনৰ বিজেপিৰ চৰণত শৰনাপন্ন ৰাজ্যৰ ‘প্ৰধান’ আঞ্চলিক দল অগপৰ মুখ্য কাৰ্য্যালয়ৰ মজিয়া! কিয়নো কাইলৈৰ পৰা অগপ কাৰ্য্যালয় চাফা কৰাৰ দায়িত্ব লৈছে আছু এৰি ৰাজনীতিত ভৰি দিয়া মণিমাধৱ মহন্তই।

আজি অগপৰ আমবাৰীস্থিত মুখ্য কাৰ্য্যালয়ত দলটোত যোগদান কৰিয়েই ছাত্ৰ সন্থাৰ প্ৰাক্তন উপ-সভাপতি তথা মন্ত্ৰী কেশৱ মহন্তৰ ভাতৃ মণিমাধৱ মহন্তই প্ৰকাশ কৰে অগপ কাৰ্য্যালয়ত ‘চাফাই অভিযান’ চলোৱাৰ ইচ্ছা।

অগপত ‘যোগদান কৰি কাৰ্য্যালয়টো চাফা কৰাটোৱেই’ তেওঁৰ ‘প্ৰথম দায়িত্ব আৰু কৰ্তব্য হ’ব’ বুলি ঘোষণা কৰি মহন্তই কয়, ‘সভাপতি অতুল বৰাই দলৰ কাৰণে প্ৰথমে কি কাম কৰিম বুলি সুধিছিল। দলৰ কাৰ্য্যালয়টো সাৰিবলৈ আৰু মচিবলৈ দিলে মই খুব ভাল পাম বুলি তেওঁক কৈছিলো। কাইলৈ ৰাতিপুৱা আহি কাৰ্য্যালয়টো এবাৰ সাৰিম আৰু মচিম।‘

ইয়াৰ মাজতে আছুত থাকোতেও আছুৰ কাৰ্য্যালয়ত ঝাড়ু দিছিল বুলি উল্লেখ কৰি তেওঁ কয়, ‘ছাত্ৰ সন্থাত যোগদান কৰাৰ সময়ত অৰ্থ্যাৎ ১৯৯৭ চনত মানুহে খাই এৰি যোৱা পাত পেলাইছিলো। লগতে কাৰ্য্যালয় ঝাড়ু দিছিলো। সেই দুটাই জীৱনৰ আটাইতকৈ পবিত্ৰ আৰু শ্ৰেষ্ঠ কৰ্ম বুলি ভাবিছিলো।’

উল্লেখযোগ্য যে সমাগত লোকসভা নিৰ্বাচনত কলিয়াবৰ সমষ্টিৰ পৰা অগপ-বিজেপিৰ মিত্ৰজোটৰ প্ৰাৰ্থী হিচাপে মণিমাধৱ মহন্তই প্ৰতিদ্বন্দ্বিতা আগবঢ়োৱাৰ পূৰ্ণ সম্ভাৱনা আছে। আনকি দলটোত যোগদান কৰাৰ পূৰ্বেই অগপৰ প্ৰাৰ্থী হিচাপে তেওঁৰ সমৰ্থনত এটা অডিঅ’ ক্লিপ ছ’চিয়েল মিডিয়াত প্ৰচাৰ হৈ থকা দেখা গৈছিল।

নাগৰিকত্ব বিধেয়কৰ বিৰোধিতাৰ নামত বিজেপিৰ সৈতে মিত্ৰতা ছেদ কৰি পুনৰ নিৰ্বাচনৰ সময়ত বিজেপিৰে মিত্ৰতা কৰা অগপৰ প্ৰতি ৰাজ্যজুৰি ব্যাপক প্ৰতিক্ৰিয়া সৃষ্টি হৈছিল। খোদ দলটোৰ তৃণমূল কৰ্মী-সমৰ্থকে অসন্তুষ্টি আৰু বিষোদগাৰ প্ৰকাশ কৰিছিল। বিভিন্নজনে অগপই ৰাজ্যত আঞ্চলিকতাবাদক নিশকতীয়া কৰি অনাৰ অভিযোগ আনিছে।

এনে অৱস্থাত জ্যেষ্ঠসকলক অনুকৰণ কৰি ‘ছাত্ৰ ৰাজনীতি’ এৰি নিৰ্বাচনী ৰাজনীতিত ভৰি দিয়া মণি মাধৱ মহন্তৰ ‘চাফাই অভিযান’এ অগপক কিমান ‘চাফা’ কৰে সেয়া লক্ষণীয় হ’ব।