দুটা সমষ্টিত প্ৰতিদ্বন্দ্বিতা কৰাৰ মন প্ৰাক্তন তাৰকা ফুটবলাৰ বাইচুং ভূটীয়াৰ

আগন্তুক ছিকিম বিধানসভা নিৰ্বাচনত এটাতকৈ অধিক সমষ্টিৰ পৰা নিৰ্বাচনত প্ৰতিদ্বন্দ্বিতা কৰাৰ ইচ্ছা প্ৰকাশ কৰিছে হামৰো ছিকিম পাৰ্টিৰ কাৰ্য্যকৰী সভাপতি তথা ভাৰতীয় ফুটব’ল দলৰ প্ৰাক্তন অধিনায়ক বাইচুং ভূটীয়াই।

সূত্ৰত প্ৰকাশ পোৱা অনুসৰি ভূটীয়াই তেওঁ প্ৰতিদ্বন্দ্বিতা কৰা বিধানসভা সমষ্টিটো তেওঁৰ বুকুৰ আপোন হিচাপে অভিহিত কৰে।

আগন্তুক দুটা দিনত প্ৰাক্তন তাৰকা ফুটবলাৰগৰাকীয়ে প্ৰতিদ্বন্দ্বিতা কৰিবলগীয়া সমষ্টিৰ নাম ঘোষণা কৰাৰ সম্ভাৱনা আছে।

উল্লেখযোগ্য যে, ২০১৪ চনত সক্ৰিয় ৰাজনীতিত আত্মপ্ৰকাশ কৰা বাইচুং ভূটীয়াই ২০১৪ লোকসভা নিৰ্বাচনত তৃণমূল কংগ্ৰেছৰ প্ৰাৰ্থী হিচাপে দাৰ্জিলিং সমষ্টিৰ পৰা প্ৰতিদ্বন্দ্বিতা কৰি পৰাস্ত হৈছিল।

হামৰো ছিকিম পাৰ্টিয়ে এতিয়ালৈ ৰাজ্যখনৰ ৩২ টা বিধানসভা সমষ্টিৰ ভিতৰত ১৪ টা সমষ্টিৰ প্ৰাৰ্থীৰ তালিকা ঘোষণা কৰিছে।

ছিকিমত লোকসভা নিৰ্বাচনৰ লগত একেলগে এটা পৰ্য্যায়ত ১১ এপ্ৰিলত বিধানসভা নিৰ্বাচন অনুষ্ঠিত হ’ব।