মাৰ্ঘেৰিটাত চাঞ্চল্যকৰ ঘটনা: বুঢ়ীদিহিং নদীত জাঁপ দিলে এগৰাকী সাংবাদিকে
শনিবাৰে বিয়লি মাৰ্ঘেৰিটাৰ নৱনিৰ্মিত দলঙৰ পৰা উফন্দি থকা বুঢ়ীদিহিং নদীত জাঁপ দিয়া এগৰাকী স্থানীয় টেলিভিছন সাংবাদিকৰ সন্ধানত আৰক্ষী আৰু ৰাজ্যিক দুৰ্যোগ প্ৰশমন বাহিনীয়ে এক বিস্তৃত উদ্ধাৰ অভিযান অব্যাহত ৰাখিছে। সন্ধানহীন সাংবাদিকগৰাকীক এটা বৈদ্যুতিন সংবাদ মাধ্যমৰ মাৰ্ঘেৰিটাৰ সংবাদদাতা উজ্জ্বল চৌধুৰী বুলি চিনাক্ত কৰা হৈছে। সহকৰ্মীৰ সৈতে স্কুটাৰত গৈ থকা অৱস্থাত হঠাতে দলঙৰ পৰা নদীত জাঁপ দিয়া এই ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে।
প্ৰাপ্ত তথ্য অনুসৰি শনিবাৰে বিয়লি উজ্জ্বল চৌধুৰীয়ে তেওঁৰ সহকৰ্মী নিতুল ভৰালীৰ সৈতে এখন স্কুটাৰত লিডুৰ পৰা মাৰ্ঘেৰিটালৈ গৈ আছিল। বুঢ়ীদিহিং নদীৰ নতুন দলংখন পোৱাৰ লগে লগে চৌধুৰীয়ে ভৰালীক স্কুটাৰখন ৰখাবলৈ কয়। কোনেও কিছু বুজি উঠাৰ পূৰ্বেই তেওঁ ততাতৈয়াকৈ উফন্দি থকা নদীখনত জাঁপ দিয়ে। এই ঘটনাৰ প্ৰত্যক্ষদৰ্শী তথা তেওঁৰ সহকৰ্মী নিতুল ভৰালীয়ে প্ৰকাশ কৰা মতে চৌধুৰীয়ে মাৰ্ঘেৰিটাত কাৰোবাক লগ কৰাৰ কথা কৈ তেওঁৰ সৈতে স্কুটাৰত উঠিছিল।
ভৰালীয়ে ঘটনাটোৰ বিৱৰণ দি কয় যে দলংখন পোৱাৰ পিছত চৌধুৰীয়ে তেওঁক ৰখাবলৈ কোৱাৰ লগে লগে তেওঁ স্কুটাৰখন ৰখাইছিল আৰু সেই মুহূৰ্ততে চৌধুৰীয়ে নদীত জাঁপ দিয়ে। তেওঁ স্কুটাৰখন ভালদৰে ৰখোৱাৰ বা চৌধুৰীক ধৰিবলৈ কোনো সুৰুঙাই নাপালে বুলিও জানিবলৈ দিয়ে।
ঘটনাৰ খবৰ পোৱাৰ লগে লগে মাৰ্ঘেৰিটা আৰক্ষীৰ এটা দল ঘটনাস্থলীত উপস্থিত হয় আৰু ৰাজ্যিক দুৰ্যোগ প্ৰশমন বাহিনীৰ (এছ ডি আৰ এফ) সহযোগত তাৎক্ষণিকভাৱে উদ্ধাৰ অভিযান আৰম্ভ কৰে। অৱশ্যে নেৰানেপেৰা বৰষুণৰ ফলত নদীৰ জলস্তৰ অস্বাভাৱিকভাৱে বৃদ্ধি পোৱাৰ লগতে প্ৰবল সোঁতে উদ্ধাৰ অভিযানত যথেষ্ট প্ৰত্যাহ্বানৰ সৃষ্টি কৰিছে।
সাংবাদিক উজ্জ্বল চৌধুৰীয়ে কি পৰিস্থিতিত পৰি এনে এক চৰম পন্থা গ্ৰহণ কৰিলে সেয়া বৰ্তমানলৈকে স্পষ্ট হোৱা নাই। মাৰ্ঘেৰিটা আৰক্ষীয়ে সমগ্ৰ ঘটনাটোৰ আঁৰৰ প্ৰকৃত কাৰণ আৰু পৰিস্থিতি নিৰ্ণয় কৰাৰ উদ্দেশ্যে ইতিমধ্যে এক আনুষ্ঠানিক তদন্ত আৰম্ভ কৰিছে আৰু সন্ধানহীন সাংবাদিকগৰাকীৰ উদ্ধাৰৰ বাবে নিৰন্তৰ প্ৰচেষ্টা অব্যাহত ৰাখিছে বুলি জানিবলৈ দিছে।