মাৰ্ঘেৰিটাৰ সমাজকৰ্মী ৰজনী গগৈ আৰু নাই

ডিব্ৰুগড়ৰ এখন ব্যক্তিগত চিকিৎসালয়ত চিকিৎসাধীন অৱস্থাত শুকুৰবাৰে শেষ নিশ্বাস ত্যাগ কৰিছে মাৰ্ঘেৰিটাৰ সমাজকৰ্মী ৰজনী গগৈয়ে।

১৯৫৩ চনৰ ৩ জানুৱাৰিত জন্ম গ্ৰহণ কৰা গগৈ মাৰ্ঘেৰিটাৰ বিভিন্ন অনুষ্ঠান-প্ৰতিষ্ঠানৰ লগত ওতপ্ৰোতভাৱে জড়িত আছিল৷ মাৰ্ঘেৰিটাৰ ১-২নং লাজুম নামঘৰৰ প্ৰাক্তন সভাপতি, নিউ কলনিস্থিত মাৰ্ঘেৰিটা সমন্বয় কলা কৃষ্টি কেন্দ্ৰৰ প্ৰতিষ্ঠাপক সম্পাদক, পূৰ্বঞ্চল টাই আহোম চেংৰণৰ প্ৰাক্তন সভাপতি, তিনিচুকীয়া জিলা ক্ষুদ্ৰ চাহ খেতিয়ক সন্থাৰ প্ৰাক্তন সভাপতি, তিনিচুকীয়া জিলা ঘৰচীয়া হাতী সন্থাৰ প্ৰাক্তন সভাপতি হিচাপে কাৰ্য্যনিৰ্বাহ কৰা উপৰিও তেওঁ কেইবাখনো স্থানীয় বিদ্যালয়ৰ পৰিচালনা সমিতিৰ লগতো জড়িত আছিল৷

গগৈৰ মৃত্যুত মাৰ্ঘেৰিটা আঞ্চলিক ছাত্ৰ সন্থা, মাৰ্ঘেৰিটা জিলা ক্ৰীড়া সন্থা, মাৰ্ঘেৰিটা সাংবাদিক সন্থা, স্থানীয় বিধায়ক ভাস্কৰ শৰ্মা, মাৰ্ঘেৰিটা প্ৰবীণ খেলুৱৈ সন্থা, ক্ষুদ্ৰ চাহ খেতিয়ক সন্থা, সাংবাদিক মানস প্ৰতিম গগৈ, অসম জাতীয়তাবাদী যুৱ ছাত্ৰ পৰিষদৰ মাৰ্ঘেৰিটা আঞ্চলিক সমিতি তথা স্থানীয় কেইবাটাও দল সংগঠনে গভীৰ শোক প্ৰকাশ কৰাৰ লগতে শোক সন্তপ্ত পৰিয়াল বৰ্গলৈ গভীৰ সমবেদনা জ্ঞাপন কৰিছে৷

মাৰ্ঘেৰিটা আছুৱে সংগঠনৰ পতাকাৰে গগৈক শ্ৰদ্ধাঞ্জলি জনায়।

গগৈৰ বিয়োগত মাৰ্ঘেৰিটাৰ সামাজিক ক্ষেত্ৰখনত শূন্যতাই বিৰাজ কৰাৰ লগতে অঞ্চলটোত গভীৰ শোকৰ ছাঁ‌ পৰিছে৷

মৃত্যুৰ সময়ত ইহ সংসাৰত তেওঁ পত্নী, দুই পুত্ৰ আৰু জী-জোঁৱাইক এৰি থৈ গৈছে৷