যোৰহাটত কাছ পোৱালি সহ মাংস উদ্ধাৰ, এজনক আটক

যোৰহাট বন বিভাগৰ উদ্যোগত সদৰ আৰক্ষীৰ সহযোগত এক অনুসন্ধানৰ ভিত্তিত চোলাধৰা অঞ্চলৰ এজন ব্যক্তিৰ ঘৰৰ পৰা এটা বেগত আধা কেজি ওজনৰ তিনিটা কৈ কাছ পোৱালি উদ্ধাৰ কৰে।

যতীন হাজৰিকা নামৰ ব্যক্তিজনৰ পৰা অনুসন্ধানকাৰী দলটোৱে লগতে এটা বেগত কিছু মাংস জব্দ কৰে।

ইতিমধ্যে আৰক্ষীয়ে অভিযুক্ত যতীন হাজৰিকাক আটক কৰি সদৰ থানালৈ লৈ যোৱা হৈছে বুলি আৰক্ষীয়ে জানিবলৈ দিয়ে।

আৰক্ষী সূত্ৰই জানিবলৈ দিয়া মতে জব্দ কৰা মাংস খিনি কাছ মাংস বুলি সন্দেহ কৰা হৈছে যদিও ফৰেনচিক পৰীক্ষাৰ পিছতহে এই সন্দৰ্ভত নিশ্চিত হ’ব।

উদ্ধাৰ হোৱা কাছ পোৱালি কেইটা আৰক্ষীয়ে বনবিভাগক চমজাই দিছে।

আনহাতে ধৃত যতীন হাজৰিকাক আৰক্ষী জিম্মাত ৰাখি এই সন্দৰ্ভত সোধা পোছা অব্যাহত ৰাখিছে।