৪০,৫৫৪ মেট্ৰিক টন কয়লা চুৰি: তদন্তৰ নিৰ্দেশ কমিটীৰ

পূব জয়ন্তীয়া পাহাৰৰ ক’ল ইণ্ডিয়া লিমিটেডৰ দ্বাৰা পৰিচালিত ডিপোত  ৪০,৫৫৪.৭২ মেট্ৰিক টন কয়লা নিৰুদ্দেশ হোৱাৰ বিষয়টো তদন্ত কৰিবলৈ অৱসৰপ্ৰাপ্ত ন্যায়াধীশ বি পি কাটাকেৰ নেতৃত্বত এখন কমিটীয়ে খনি আৰু ভূতত্ত্ব বিভাগৰ সচিবক নিৰ্দেশ দিছে। কমিটীয়ে দুসপ্তাহৰ ভিতৰত প্ৰতিবেদন দাখিল কৰিব লাগিব বুলিও উল্লেখ কৰিছে।

উল্লেখ্য যে দুখন চৰকাৰী প্ৰতিবেদন তুলনা কৰোঁতে এই বিষয়টো পোহৰলৈ আহে। খনিজ সম্পদ সঞ্চালকে ২০২৫ চনৰ ২১ এপ্ৰিলত ১,৯৩,২৭০.৩৭ মেট্ৰিক টন কয়লাৰ তথ্য দিয়াৰ বিপৰীতে, জোৱাইৰ সংমণ্ডলীয় খনি বিষয়াই(DMO) ২০২৫ চনৰ ১৭ এপ্ৰিলত নিলামৰ পিছত মাত্ৰ ১,৫২,৭১৫.৬৫ মেট্ৰিক টন কয়লাৰ তথ্য প্ৰদান কৰিছিল।

উল্লেখ্য যে কমিটীয়ে কেইবাখনো জিলাত কয়লা বিক্ৰীত পলম হোৱাৰ কথাও লক্ষ্য কৰে কাৰণ এপ্ৰিল মাহৰ পৰা কোনো নিলাম অনুষ্ঠিত হোৱা নাই, যদিও অধিক কয়লা বিক্ৰীৰ বাবে ৰখা হৈছিল। পূব জয়ন্তীয়া পাহাৰত ১,৯৬,৭৪০.৩৭ মেট্ৰিক টন নিলামৰ বাবে ৰখা হৈছিল যদিও মাত্ৰ ৩,৪০০ মেট্ৰিক টনহে বিক্ৰী হৈছিল। কোনো নিলাম নোহোৱাৰ বাবে বিভিন্ন ডিপোত বিশাল পৰিমাণৰ কয়লা অব্যৱহৃত হৈ পৰি আছে।

ইয়াৰ উপৰিও ১৫টা ক’ক অভেন প্লাণ্ট আৰু মেছাৰ্ছ শ্ৰী শকাম্বৰী ফেৰ’ এলয় প্ৰাইভেট লিমিটেড নামৰ কোম্পানী এটাৰ পৰা বৃহৎ পৰিমাণৰ ধন জৰুৰীভাৱে উদ্ধাৰৰ আহ্বান জনায়। প্ৰতিবেদন অনুসৰি  উচ্চতম ন্যায়ালয়ৰ নিৰ্দেশৰ পিছতো ৩৩টা অবৈধ ক’ক অভেন প্লাণ্ট (পূব জয়ন্তীয়া পাহাৰত ১৬টা আৰু পশ্চিম খাছি পাহাৰত ১৭টা) এতিয়াও ভাঙি পেলোৱা হোৱা নাই। পূব জয়ন্তীয়া পাহাৰত ১৬টা উদ্যোগৰ আটাইকেইটালৈ কাৰণ দৰ্শোৱাৰ জাননী প্ৰেৰণ কৰা হৈছিল যদিও কোনো এটাই সঁহাৰি দিয়া নাই। অবৈধ উদ্যোগসমূহ ভাঙিবলৈ পুঁজি এতিয়াও মুকলি কৰা হোৱা নাই। কমিটীয়ে উপ-আয়ুক্তক পুঁজি লাভ কৰাৰ দুসপ্তাহৰ ভিতৰত উদ্যোগসমূহ ভাঙি প্ৰতিবেদন দাখিল কৰিবলৈ নিৰ্দেশ দিছে।

৩৩টা অবৈধ উদ্যোগৰ আটাইকেইটা ভাঙি পেলাবলৈ ধন শীঘ্ৰে মুকলি কৰাৰ দাবী জনাই কমিটীয়ে জিলা কৰ্তৃপক্ষক ভাঙি পেলোৱা পৰ্যন্ত উদ্যোগসমূহ বন্ধ ৰাখিবলৈ ব্যৱস্থা গ্ৰহণৰ নিৰ্দেশ দিছে।