‘নাম কি? মহম্মদ নেকি?’: মানসিক ৰোগত আক্ৰান্ত ব্যক্তিৰ ধৰ্মীয় পৰিচয় বিচাৰি শাৰীৰিক আক্ৰমণ; মৃতদেহ উদ্ধাৰ
সাৱধান! আপুনি যদি ঘৰৰ পৰা ক’ৰবালৈ ওলাই গৈছে সাৱধান হওক। লগত ৰাখক আধাৰ কাৰ্ড, পান কাৰ্ড অথবা অন্য কোনো পৰিচয় পত্ৰ। নহ’লে আপোনাৰ ব্যক্তিগত ধৰ্মীয় পৰিচয় বিচাৰি আপোনাক যাত্ৰা পথতে কোনোবাই আক্ৰমণ কৰিব পাৰে।
হয়, আচৰিত যেন লাগিলেও এনে এটা পৰিৱেশ এতিয়া দেশত গঢ় লৈ উঠিছে। এক কথাত এনে এটা পৰিৱেশ গঢ়ি তুলিছে একাংশ গোড়া ধৰ্মান্ধ লোকে। দেশৰ বৰ্তমানৰ ৰাজনৈতিক বাতাৱৰণেও এই পৰিৱেশ সৃষ্টিত উদগনি যোগাইছে। লাভ কৰিছে শাসকীয় দলৰ পৃষ্ঠপোষকতা।
মধ্য প্ৰদেশত মানসিক ৰোগত আক্ৰান্ত এজন নিৰুদ্দেশ ৬৫ বছৰীয়া বৃদ্ধক এগৰাকী ব্যক্তিয়ে “নাম কি তোৰ? মহম্মদ নেকি?” বুলি প্ৰশ্ন কৰি বাৰে বাৰে শাৰীৰিকভাৱে অপদস্থ কৰা এটা ভিডিঅ’ ভাইৰেল হৈছে।
ব্যক্তিজনৰ এই আক্ৰমণত ব্যতিব্যস্ত হৈ আক্ৰমণৰ পৰা ৰক্ষা পাবলৈ ভুক্তভোগী বৃদ্ধ লোকজনে জেপৰ পৰা কিছু টকা উলিয়াই আক্ৰমণকাৰী ব্যক্তিজনক আগবঢ়ায়। কিন্তু ইয়াৰ পাছতো আক্ৰমণকাৰীজনে বাৰে বাৰে বৃদ্ধ ব্যক্তিজনক তীব্ৰ জোৰেৰে এটাৰ পিছত আন এটা চৰ শোধায়।
উল্লেখ্য যে আক্ৰমণকাৰী ব্যক্তিজনক ইতিমধ্যে দিনেশ কুশৱাহা বুলি চিনাক্ত কৰা হৈছে। জানিব পৰা মতে কুশৱাহা এজন প্ৰাক্তন বিজেপি কৰ্পোৰেটৰৰ স্বামী।
A murder case has been registered in after a 65-year-old with mental illness was found dead and a video showed Dinesh Kushwaha, husband of an ex BJP corporator asking him if his “name is Mohammed” and repeatedly assaulting him as he struggled to answer @ndtv @ndtvindia pic.twitter.com/jWNDlLKpFb
— Anurag Dwary (@Anurag_Dwary) May 21, 2022
আনহাতে ভিডিঅ’টোত আক্ৰমণৰ সন্মুখীন হোৱা বৃদ্ধ লোকজনক শুকুৰবাৰে মৃত অৱস্থাত নীমুচ জিলাৰ এটা পথৰ কাষত উদ্ধাৰ কৰাৰ পাছত চাঞ্চল্যৰ সৃষ্টি হৈছে। নিহত ব্যক্তিজনক ৰটলাম জিলাৰ ভানৱাৰলাল জৈন বুলি চিনাক্ত কৰা হৈছে।
জানিব পৰা মতে ভানৱাৰলাল জৈন ৰাজস্থানৰ এটা ধৰ্মীয় অনুষ্ঠান পৰিদৰ্শন কৰাৰ পিছত ১৫ মে’ৰ পৰা নিৰুদ্দেশ হৈ আছিল। শুকুৰবাৰে তেওঁৰ মৃতদেহ উদ্ধাৰ কৰাৰ পাছত আৰক্ষীয়ে তেওঁৰ পৰিয়ালক মৃতদেহ হস্তান্তৰ কৰে।
আনহাতে মৃত ব্যক্তিজনৰ পৰিয়ালটোৱে সম্প্ৰতি ভাইৰেল হৈ পৰা ভিডিঅ’টোৰ বিষয়ে জানিব পাৰি আৰক্ষীৰ কাষ চাপে আৰু আক্ৰমণকাৰী কুশৱাহাক তাৎক্ষণিকভাৱে গ্ৰেপ্তাৰ কৰিবলৈ দাবী জনায়।
এই দাবীৰ পিছতে নীমচু জিলা আৰক্ষী চকীত অভিযুক্ত কুশৱাহাৰ বিৰুদ্ধে এটা গোচৰ ৰুজু কৰা হয়। অৱশ্যে এই পৰ্যন্ত আৰক্ষীয়ে কুশৱাহা নামৰ লোকজনক গ্ৰেপ্তাৰ কৰা নাই বুলি জানিব পৰা গৈছে।