৭ বছৰত দেশৰ আধা সংখ্যক ৰাজ্যত অসংগঠিত খণ্ডত লাখ লাখ লোকে হেৰুৱাইছে জীৱিকা; অসমত হেৰুৱালে ৪ লাখ ৯৪হাজাৰজনে

দেশৰ অৰ্থনীতি বৃদ্ধিৰ বাবে তৃতীয়খন মোদী চৰকাৰৰ প্ৰথম প্ৰত্যাহ্বান হৈছে চাকৰি সৃষ্টি। অৰ্থনীতিবিদসকলে কয় যে আগন্তুক দশকলৈ বছৰি ১ কোটি ২০ লাখ টকাৰ জীৱিকা সৃষ্টি কৰাটোৱেই ৰাষ্ট্ৰীয় অৰ্থনীতিৰ স্থায়িত্ব হ’ব পাৰে। এনে পৰিস্থিতিত চৰকাৰী তথ্য অনুসৰি বিগত ৭ বছৰত দেশৰ আধাতকৈও অধিক ৰাজ্য আৰু কেন্দ্ৰীয় শাসিত অঞ্চলত লাখ লাখ লোক অসংগঠিত খণ্ডত নিবনুৱা হৈ পৰিছে। তাৰ ভিতৰত পশ্চিম বংগ শীৰ্ষত আছে।

এই তথ্য ৰাষ্ট্ৰীয় নমুনা জৰীপ কাৰ্যালয়ৰ অসংগঠিত খণ্ডৰ বাৰ্ষিক নমুনা জৰীপ প্ৰতিবেদনত উপস্থাপন কৰা হৈছে। উল্লেখ কৰা অনুসৰি ১৮খন ৰাজ্যৰ ভিতৰত ১৩খন ৰাজ্য আৰু তিনিখন কেন্দ্ৰীয় শাসিত অঞ্চলত অসংগঠিত খণ্ডত সাধাৰণ লোকসকল যথেষ্ট নিবনুৱা হৈ পৰিছে। ইয়াৰ ভিতৰত বংগ শীৰ্ষত আছে। ইয়াত ২০১৫-১৬ চনৰ পৰা ২০২২-২৩ চনলৈ সাত বছৰত ৩০ লাখ লোক নিবনুৱা হৈ পৰিছিল।

অসংগঠিত খণ্ডত ক্ষুদ্ৰ ব্যৱসায় অন্তৰ্ভুক্ত, যিবোৰ একক মালিকানাধীন বা অংশীদাৰিত্ব ভিত্তিক হ’ব পাৰে। পশ্চিম বংগৰ পাছত কৰ্ণাটক কাম আৰু ব্যৱসায় বন্ধৰ তালিকাত আছে। একে সময়তে ১৩ লাখ লোকে চাকৰি হেৰুৱালে।

ইয়াৰ পিছতে আছে তামিলনাডু (১২ লাখ), উত্তৰ প্ৰদেশ (৭ লাখ ৯১ হাজাৰ), অন্ধ্ৰপ্ৰদেশ (৬ লাখ ৭৭ হাজাৰ), কেৰালা (৬ লাখ ৪০ হাজাৰ), অসম (৪ লাখ ৯৪ হাজাৰ) আৰু তেলেংগানা (৩ লাখ ৪৪হাজাৰ)৷ কেন্দ্ৰীয় শাসিত অঞ্চলৰ ভিতৰত দিল্লী শীৰ্ষত আছে। তাত প্ৰায় ৩ লাখ লোকে জীৱিকা হেৰুৱাইছে। ইয়াৰ পিছতে চণ্ডীগড় (৫১ হাজাৰ) আৰু পুডুচেৰী (৩২ হাজাৰ)। ইয়াৰ ভিতৰত জম্মু-কাশ্মীৰ আৰু লাডাখ অন্তৰ্ভুক্ত নহয়।

অৱশ্যে ইয়াৰ বিপৰীত ছবিখনো আছে। এই সাত বছৰত কৰ্মসংস্থাপন বৃদ্ধিৰ ক্ষেত্ৰত মহাৰাষ্ট্ৰই প্ৰথম স্থান লাভ কৰিছে। ২৪ লাখ শ্ৰমিক সংযোজন কৰিছে। গুজৰাটত অতিৰিক্ত ৭ লাখ ৬২ হাজাৰ লোকে জীৱিকা অৰ্জন কৰিলে। তৃতীয় স্থান দখল কৰিছে ওড়িশা (৭ লাখ ৬১ হাজাৰ), ৰাজস্থান (৭ লাখ ৫৬ হাজাৰ)।