আন্তৰ্জাতিক মুকাভিনয় মহোৎসৱত প্রদর্শনেৰে অসমলৈ গৌৰৱ কঢ়িয়াই আনিছে মিনাংকই

প্ৰসিদ্ধ মুকাভিনেতা মইনল হকৰ ছাত্ৰ অসমৰ এগৰাকী প্ৰতিভাশালী যুৱ মুকাভিনয় শিল্পী মিনাংক ডেকাই কলকাতাৰ ইষ্টাৰ্ণ জ’নেল কালছাৰেল চেন্টাৰত যোৱা ২৪ মাৰ্চৰ পৰা ৩০ মাৰ্চলৈকে অনুষ্ঠিত ইণ্ডিয়া ইন্টাৰনেশ্যনেল মুকাভিনয় মহোৎসৱত প্ৰদৰ্শন আগবঢ়াই প্ৰশংসা বুটলিবলৈ সক্ষম হৈছে।

মৃনাংকই আগবঢ়োৱা তেওঁৰ একক অভিনয়সমূহৰ শিৰোণাম আছিল ‘মিনাংকৰ প্ৰথম প্ৰেম’(Minangka’s first love) ‘মন্দিৰ দৰ্শন’(Mandir Darshan), আৰু গাখীৰৱালা ( Milk Man)। তেওঁ বিশাল দৰ্শক সন্মুখত তেওঁৰ এই অভিনয়ৰ প্ৰদৰ্শন দাঙি ধৰে।

মহোৎসৱখনি ইণ্ডিয়ান মাইম থিয়েটাৰ চৌহদৰ পৰা ইষ্টাৰ্ণ জ’নেল কালছাৰেল চেন্টাৰলৈকে উলিওৱা এক সমদলেৰে আৰম্ভ হৈছিল। এই সমদলৰ নেতৃত্ব দিছিল প্ৰসিদ্ধ ভাৰতীয় মুকাভিনেতা পদ্মশ্ৰী নিৰঞ্জন গোস্বামীৰ লগতে আন বহুতো লব্ধ প্ৰতিষ্ঠ ব্যক্তিয়ে। সমদলটোত মিনাংকৰ বিষয়বস্তু আছিল ‘চেভ নেশ্যাৰ’(Save Nature)।

‘’মই জনসাধাৰণে নৃত্য বা সংগীতৰ বিষয়ে যিদৰে আলোচনা কৰে তেনেদৰে মুকাভিনৰো আলোচনা কৰাটো বিচাৰো,’’-মিনাংক ডেকাই কয়।

সাতদিনীয়াকৈ অনুষ্ঠিত হোৱা এই মহোৎসৱত মেক্সিকো, জাপান, বাংলাদেশ, জাৰ্মাণী, নেপাল, শ্ৰীলংকাৰ লগতে আনকেইখনমান দেশৰ শিল্পীয়েও প্ৰদৰ্শন আগবঢ়ায়। সেইদৰে দেশৰ ৰাজস্থান, কেৰালা, উৰিষ্যা, মণিপুৰ, বিহাৰ আৰু পশ্চিমবংগৰ শিল্পীয়েও তেওঁলোকৰ প্ৰতিভা দাঙি ধৰে।

মহোৎসৱখনিত অসমৰ আন দুগৰাকী যুৱ মুকাভিনয় শিল্পী কুলদ্বীপ পাটগিৰি আৰু বিজিত কুমাৰ দাসেও প্ৰদৰ্শন আগবঢ়ায়।