আদৰণি সমিতিৰ কাৰ্য্যকৰী সভাপতিৰ পদত বাহাল অতুল বৰা; CAA-বিৰোধী শংকৰদেৱ সংঘৰ অধিৱেশনস্থলী পৰিদৰ্শন মন্ত্ৰীজনৰ

নাগৰিকত্ব (সংশোধন) আইনৰ স্পষ্ট বিৰোধিতা কৰা শ্ৰীমন্ত শংকৰদেৱ সংঘৰ বোকাখাতত হ’ব লগীয়া ৮৯ সংখ্যক বাৰ্ষিক অধিৱেশনৰ স্থান আজি পৰিদৰ্শন কৰি অধিৱেশনৰ প্ৰস্তুতিৰ বুজ লয় CAA-ৰ সমৰ্থক মন্ত্ৰী অতুল বৰাই।

অগপৰ সভাপতি তথা ৰাজ্যৰ কৃষি মন্ত্ৰীজন অধিৱেশনৰ আদৰণি সমিতিৰ কাৰ্য্যকৰী সভাপতি পদত আছে।

বৰাই আদৰণি সমিতিৰ মুখ্য কাৰ্য্যালয়ত উপস্থিত হয় আৰু অধিৱেশনৰ প্ৰস্তুতি সন্দৰ্ভত আন আনসকলৰ সৈতে আলোচনা কৰে।

যোৱা ১৩ ডিচেম্বৰত সংঘই CAA-ৰ বিৰোধিতা কৰি বোকাখাতত প্ৰতিবাদী সমদল উলিয়াইছিল আৰু তাত আদৰণি সমিতিৰ এগৰাকী বিষয়ববীয়াই মন্ত্ৰীজনক আদৰণি সমিতিৰ পৰা পদত্যাগ কৰি ৰাইজৰ কাষত থিয় হ’বলৈ আহ্বান জনাইছিল।

“অতুল বৰাৰ আমি পদত্যাগ বিচাৰিম। তেওঁ “কেব”ৰ সমৰ্থন কৰিছে। “কেব” নথকাহেঁতেন তেওঁ আদৰণি সমিতিত থাকিব পাৰিলে হেঁতেন। সংঘৰ মূল বিষয়ববীয়াসকলে ইয়াৰ বিচাৰ কৰি পদক্ষেপ ল’ব”, আদৰণি সমিতিৰ বিষয়ববীয়াজনে সংবাদ মাধ্যমৰ আগত কৈছিল।

মন্ত্ৰী অতুল বৰাৰ “কেব”ক সমৰ্থন কৰা বিষয়টো সংঘৰ কাৰ্য্যনিৰ্বাহক বৈঠকত আলোচনা কৰিব বুলি পদাধিকাৰ কমলাকান্ত গগৈয়েও জানিবলৈ দিছিল।

“আমি অচিৰেই কাৰ্য্যনিৰ্বাহক বৈঠক অনুষ্ঠিত কৰি এই সন্দৰ্ভত আলোচনা কৰিম। আলোচনা কৰি এক সিদ্ধান্ত লোৱা হ’ব”, সাংবাদিকৰ আগত গগৈয়ে মন্তব্য কৰিছিল।

উল্লেখযোগ্য যে শ্ৰীমন্ত শংকৰদেৱ সংঘই যোৱাবাৰৰ মৰিগাওঁ অধিৱেশনলৈ প্ৰধান মন্ত্ৰী মোদীক নিমন্ত্ৰণ কৰিও CAB-ৰ বিৰুদ্ধে স্থিতি লৈ “প্ৰধান মন্ত্ৰী আহিব নালাগে” বুলি কৈ বিৰল দৃষ্টান্ত সৃষ্টি কৰিছিল।