বিদ্যুৎ সংযোগ নথকাৰ বাবেই চাৰ্জাৰ লাইটৰ পোহৰতে অসম টাই যাদুঘৰ পৰিদৰ্শন কৰিলে মন্ত্ৰী হিমন্ত বিশ্ব শৰ্মাই

অসম চৰকাৰৰ সাংস্কৃতিক সঞ্চালকালয়ৰ অধীনত থকা শিৱসাগৰৰ অসম টাই যাদুঘৰৰ দূৰাৱস্থা দেখি ক্ষোভ প্ৰকাশ কৰে ৰাজ্যৰ শিক্ষা, স্বাস্থ্য, বিত্ত তথা গড়কপ্তানি মন্ত্ৰী হিমন্ত বিশ্ব শৰ্মাই।

মন্ত্ৰীগৰাকীয়ে আজি শিৱসাগৰৰ যুৱ দ’লত অনুষ্ঠিত এখন সভাত অংশগ্ৰহণৰ অন্তত কাষতে থকা অসম টাই যাদুঘৰটো পৰিদৰ্শন কৰে। ৪/৫ দিন ধৰি বিদ্যুৎ সেৱা  বিকল হৈ থকাৰ বাবে চাৰ্জাৰ লাইটৰ পোহৰতে যাদুঘৰটো পৰিদৰ্শন কৰে মন্ত্ৰী হিমন্ত বিশ্ব শৰ্মাই।

মন্ত্ৰীগৰাকীয়ে সাংবাদিকৰ আগত কয়,  সংগ্ৰহালয়টোত থকা আপুৰুগীয়া সম্পদ সমুহ যি ধৰণে সংৰক্ষণ কৰি ৰাখিব লাগিছিল সেই ধৰণে ৰখা হোৱা নাই। চৰকাৰে এই টাই যাদুঘৰটো উন্নীতকৰণৰ ব্যৱস্থা গ্ৰহণ কৰাৰ লগতে ন ৰূপত সজাই তুলিব বুলি তেওঁ মন্তব্য কৰে।

ইপিনে  সময়মতে  যাদুঘৰটোত নিয়োজিত কৰ্মচাৰী আহি নোপোৱাত শিৱসাগৰ জিলা উপায়ুক্তই প্ৰৱেশদ্বাৰৰ তলা ভাঙি দিয়াতহে মন্ত্ৰীগৰাকীয়ে টাই যাদুঘৰত প্ৰৱেশ কৰিব পাৰে।