চৰম নাৰীবিদ্বেষী মানসিকতা! মিছ ৱৰ্ল্ড-২০২৫ৰ প্ৰতিযোগীক আয়োজকে যৌনকৰ্মীৰ দৰে ব্যৱহাৰ কৰাৰ অভিযোগ
হায়দৰাবাদত অনুষ্ঠিত হৈ থকা মিছ ৱৰ্ল্ড ২০২৫ প্ৰতিযোগিতাত আয়োজকৰ বিৰুদ্ধে চৰম নাৰীবিদ্বেষী তথা পুৰুষতান্ত্ৰিক আচৰণৰ অভিযোগ উত্থাপন হোৱাৰ পিছতে, সমগ্ৰ বিষয়টো ব্যাপক চৰ্চা লাভ কৰিছে।
এই সৌন্দৰ্য প্ৰতিযোগিতাৰ মাজতে মিছ ইংলেণ্ড মিলা মেগীয়ে হঠাৎ প্ৰতিযোগিতাখনৰ পৰা নাম প্ৰত্যাহাৰ কৰা পিছতে এই বিতৰ্কৰ সূত্ৰপাত হয়। মিলাই আয়োজকসকলৰ বিৰুদ্ধে শোষণ আৰু নাৰীবিদ্বেষী ব্যৱহাৰৰ অভিযোগ তোলাৰ পাছতে বিশ্বজুৰি সৰৱ চৰ্চা চলিছে।
এই পৰিস্থিতিত মিলাৰ সমৰ্থনত আগবাঢ়ি আহিছে তেলেংগানাৰ প্ৰাক্তন মন্ত্ৰী কে টি ৰামা ৰাও (কেটিআৰ)। তেওঁ সামাজিক মাধ্যমত মিছ ইংলেণ্ড মিলাৰ সমৰ্থনত লিখিছে যে “মিছ ৱৰ্ল্ডৰ দৰে আন্তঃৰাষ্ট্ৰীয় প্ৰতিযোগিতাত নাৰীবিদ্বেষী মনোভাৱৰ বিৰুদ্ধে প্ৰতিবাদ জনাবলৈ যথেষ্ট সাহসৰ প্ৰয়োজন। মিলা মেগী, এগৰাকী সাহসী মহিলা। তেলেংগানাত এনে অভিজ্ঞতা পোৱাটো দুঃখজনক বুলি মত প্ৰকাশ কৰিছে। লগতে কয় এইটো আমাৰ সংস্কৃতি নহয়। নাৰীক সন্মান কৰাটোহে তেলেংগানাৰ মূল মূল্যবোধ।”
তেওঁ এই ঘটনাৰ পুংখানুপুংখ তদন্তৰ দাবী জনাই কয়, এগৰাকী পিতৃ হিচাপে মই কামনা কৰোঁ, কোনো মহিলা বা ছোৱালীয়ে এনে অভিজ্ঞতা কেতিয়াও নাপাওক।”
প্ৰকাশিত তথ্য অনুসৰি মিলা মেগীয়ে অভিযোগ কৰে যে তেওঁলোকক যেন যৌনকৰ্মীৰ দৰে ব্যৱহাৰ কৰা হৈছিল। তেওঁৰ ভাষাত, বন্দৰে নৃত্য কৰা ধৰণেৰে পৰিবেশন কৰিবলৈ বাধ্য কৰা হৈছিল।” মেকআপ, কাপোৰ সলনি আৰু ধনী মানুহৰ সন্মুখত মনোৰঞ্জনৰ বাবে হাঁহি মাৰি ফেশ্বন শ্ব’ কৰাটো দৰকাৰ হ’ল — এনে ধৰণৰ অভিযোগে মিছ ৱৰ্ল্ডৰ দৰে সৌন্দৰ্য প্ৰতিযোগিতাৰ ভয়ানক দিখ পোহৰলৈ আহিছে। আয়োজকৰ এনে আচৰণে সচেতন মহলৰ চকু কপালত তুলিছে।
মিলাই ক্ষোভ প্ৰকাশ কৰি কয় যে তেওঁ ইয়াত মনোৰঞ্জন দিবলৈ অহা নাই। নিজৰ সন্মানৰ বাবে প্ৰতিযোগিতাৰ পৰা নাম প্ৰত্যাহাৰ কৰিছে। উল্লেখযোগ্য যে ৭৪ বছৰীয়া মিছ ৱৰ্ল্ডৰ ইতিহাসত এইবাৰ প্ৰথমবাৰৰ বাবে এগৰাকী প্ৰতিযোগীয়ে এনে সাহসিকতাৰে প্ৰতিযোগিতাৰ পৰা স্বেচ্ছায় নাম প্ৰত্যাহাৰ কৰাৰ নজিৰ দাঙি ধৰিছে।