শাৰী পিন্ধি ক্ৰিকেট খেলাত ব্যস্ত মিতালী ৰাজ; ভিডিঅ’ ভাইৰেল
আন্তঃৰাষ্ট্ৰীয় নাৰী দিৱসৰ প্ৰাকক্ষণত ভাৰতৰ মহিলা ক্ৰিকেটাৰ মিতালী ৰাজৰ এটা ভিডিঅ’ ছ’চিয়েল মিডিয়াত খুব ভাইৰেল হৈছে, য’ত মিতালীক শাৰী পিন্ধি ক্ৰিকেট খেলা দেখা পোৱা যায়।
সমাজৰ বাবে এক বিশেষ বাৰ্তা কঢ়িয়াই অনা এই বিশেষ ভিডিঅ’টো মিতালীয়ে নিজৰ ইনষ্টাগ্ৰামত শ্বেয়াৰ কৰে।
ভিডিঅ’টো শ্বেয়াৰ কৰোতে মিতালীয়ে কেপশ্যনত লিখিছে, ‘প্ৰত্যেকখন শাৰীয়ে বহুত কিবা কিবি কয়, আপোনাতকৈও অধিক। ই কেতিয়াও আপোনাক ফিট হ’বলৈ নকয়। আহক এইবাৰ আন্তঃৰাষ্ট্ৰীয় মহিলা দিৱস উপলক্ষে নিজস্ব ধৰণে জীৱন যাপন কৰাৰ আৰম্ভ কৰো’।
ভিডিঅ’টো দেখি অনুৰাগী সকলে ছ’চিয়েল মিডিয়াৰ জৰিয়তে মিতালীক খুব প্ৰশংসা কৰিছে।
এজন অনুৰাগীয়ে লিখিছে, ‘মিতালীয়ে মোৰ জীৱনত বহুত প্ৰভাৱ পেলাইছে। তেওঁ কৈছে মহিলা সকলে যি ইচ্ছা তাকেই কৰিব পাৰে’।
উল্লেখ্য যে যোৱা বছৰ টি-২০ ক্ৰিকেটৰ পৰা অৱসৰ গ্ৰহণ কৰা মিতালীৰ নামত আছে এদিনীয়া ক্ৰিকেটত সৰ্বাধিক ৰানৰ সংগ্ৰহৰ অভিলেখ। এদিনীয়াত তেওঁৰ সৰ্বমুঠ ৬৮৮৮ ৰান আছে।