কাইলৈ অন্ত পৰিব ভাৰত জোড়ো ন্যায় যাত্ৰাঃ হ’ব পাৰে INDIAৰ সমন্বয় প্ৰদৰ্শন
ৰাহুল গান্ধীৰ নেতৃত্বত চলি থকা কংগ্ৰেছৰ ভাৰত জোড়ো ন্যায় যাত্ৰা দেওবাৰে অন্ত পৰিব। যোৱা ১৪ জানুৱাৰীৰ পৰা মণিপুৰৰ থৌবালৰ পৰা আৰম্ভ হোৱা এই যাত্ৰা কাইলৈ সামৰণি পৰিব মুম্বাইত।
দুমাহজোৰা এই যাত্ৰাই সামৰণি পৰালৈকে ১৫ খন ৰাজ্যৰ মাজেৰে ৬৭০০ কিলোমিটাৰতকৈ অধিক দূৰত্ব অতিক্ৰম কৰিব। মধ্য মুম্বাইৰ দাদৰ অঞ্চলৰ শিৱাজী পাৰ্কত অনুষ্ঠিত হ’ব যাত্ৰাৰ সামৰণি অনুষ্ঠান।
ভাৰত জোড়ো ন্যায় যাত্ৰাৰ এই সামৰণি সভাত বিৰোধী মিত্ৰজোঁট INDIA ই নিজা সমন্বয় তথা শক্তি প্ৰদৰ্শন কৰাৰ সম্ভাৱনা আছে। কংগ্ৰেছৰ এজন নেতাই জানিবলৈ দিয়া মতে INDIA মিত্ৰজোঁটৰ কেইবাগৰাকীয়ো নেতাই এই সভাত অংশগ্ৰহণ কৰিব।
তামিলনাডুৰ মুখ্যমন্ত্ৰী এম কে ষ্টালিন, ৰাষ্ট্ৰীয় জনতা দলৰ নেতা তেজস্বী যাদৱ আৰু সমাজবাদী পাৰ্টিৰ মুৰব্বী অখিলেশ যাদৱে সামৰণি সভাত অংশগ্ৰহণ নিশ্চিত কৰিছে বুলি মহাৰাষ্ট্ৰ বিধানসভাৰ বিৰোধী দলপতি বিজয় ৱাডেট্টীৱাৰে সদৰী কৰিছে।
তদুপৰি শিৱসেনাৰ মুৰব্বী তথা মহাৰাষ্ট্ৰৰ প্ৰাক্তন মুখ্যমন্ত্ৰী উদ্ধৱ ঠাকৰে, এন চি পিৰ মুৰব্বী শাৰদ পাৱাৰ, আম আদমি পাৰ্টিৰ লগতে বিৰোধী মিত্ৰজোঁটৰ অন্যান্য মিত্ৰৰ প্ৰতিনিধিও উপস্থিত থাকিব বুলিও তেওঁ কয়।
ৱাডেট্টীৱাৰে লগতে কয় যে যিহেতু শনিবাৰে লোকসভা নিৰ্বাচন ঘোষণা কৰা হ’ব, সেয়েহে ভাৰত জোড়ো ন্যায় যাত্ৰাৰ সামৰণি সমাৱেশৰ খৰচ নিৰ্বাচনী ব্যয়ত দেখুওৱা হ’ব।
উল্লেখ্য যে, সম্প্ৰতি মহাৰাষ্ট্ৰৰ পালঘৰ জিলাৰ মাজেৰে পাৰ হৈ গৈছে ভাৰত জোড়ো ন্যায় যাত্ৰা। শনিবাৰে বিয়লি যাত্ৰা মুম্বাইত উপস্থিত হ’ব।