বিজেপিৰ সভাপতিৰে আমানতৰ ধন বাজেয়াপ্ত হ’ল মিজোৰামত

মিজোৰামত আজি ফল ঘোষিত বিধানসভা নিৰ্বাচনৰ জৰিয়তে ১০ বছৰৰ মূৰত মিজো নেশ্যনেল ফ্ৰণ্ট শাসনলৈ ঘূৰি অহাটো নিশ্চিত হৈছে। দলটোৱে নিৰংকুশ সংখ্যাগৰিষ্ঠতা লাভেৰে শাসনাধিষ্ঠিত কংগ্ৰেছক উৎখাত কৰিবলৈ সক্ষম হৈছে। ৪০খন আসনযুক্ত বিধানসভাত দলটোৱে প্ৰয়োজনীয় ২১খন আসনতকৈ অধিক আসন লাভ কৰাটো ইতিপূৰ্বে নিশ্চিত হৈছে। দলটোৰ নেতা জুৰামথাংগা মুখ্য মন্ত্ৰী হোৱাটো প্ৰায় নিশ্চিত।

ইপিনে পাঁচখন ৰাজ্যৰ সকলোতে বিপৰ্য্যৰ সন্মুখীন হোৱা বিজেপিয়ে মিজোৰামত এখন আসন দখল কৰিবলৈ সক্ষম হৈছে যদিও লক্ষণীয় কথাটো হ’ল ৰাজ্যিক বিজেপিৰ সভাপতি আমানতৰ ধনো নাবাচিল বিজেপিৰ সভাপতি জে ভি হলুনা (J V Hluna)। টাৱি (Tawi) বিধানসভা সমষ্টিৰ পৰা প্ৰতিদ্বন্দ্বিতা কৰা হলুনা প্ৰতিদ্বন্দ্বীৰ হাতত অভিলেখ সংখ্যক ভোটত পৰাজিত হয়।

অৱশ্যে এই হতাশাৰ মাজতো তেওঁলোকৰ এজন প্ৰাৰ্থী ড০ বুদ্ধ ধন চাকমা টুইচাৱং সমষ্টিৰ পৰা জয়ী হ’বলৈ সক্ষম হৈছে। চাকমা বৰ্তমানৰ কংগ্ৰেছ চৰকাৰখনৰ মন্ত্ৰী আছিল আৰু অলপতে কংগ্ৰেছ ত্যাগ কৰি বিজেপিত যোগদান কৰিছিল। তেওঁ এইবাৰ সৰ্বাধিক আসন পোৱা মিজো নেশ্যনেল ফ্ৰণ্টৰ আৰ এম চাকমাক হৰুৱায়।

মুখ্য মন্ত্ৰী লাল থাংহাওলা দুয়োখনতে পৰাজিত

ইপিনে মুখ্য মন্ত্ৰী তথা ৰাজ্যখনত কংগ্ৰেছৰ শীৰ্ষনেতা লাল থাংহাওলায়ো তেওঁ প্ৰতিদ্বন্দ্বিতা কৰা দুয়োখন আসনতে পৰাজয় হোৱাটোও তাৎপৰ্য্যপূৰ্ণ বিবেচিত হৈছে। মুখ্য মন্ত্ৰীজনে প্ৰতিদ্বন্দ্বিতা কৰা ছাৰচিম আৰু চম্ফাই সমষ্টি, দুয়োটাতে হাৰিছে। চম্ফাই সমষ্টিত মিজো নেশ্যনেল ফ্ৰণ্টৰ লালনানলুংগাৰ (Lalnuntluanga) হাতত আৰু ছাৰচিম সমষ্টিত জুৰাম পীপলছ মুভমেণ্টৰ লালদুহমাৰ (Lalduhoma) হাতত পৰাজিত হয় মুখ্য মন্ত্ৰীজন।