কিদৰে বঞ্চিত হৈছিল ছামি! অতীতৰ অকথিত কাহিনী সোঁৱৰণ মহম্মদ ছামিৰ

দুৰন্ত প্ৰদৰ্শনেৰে সদ্যসমাপ্ত ক্ৰিকেট বিশ্বকাপত ভাৰতীয় দলৰ অভিযানৰ অন্যতম বঠাধাৰী আছিল অভিজ্ঞ তাৰকা পেচাৰ মহম্মদ ছামি। ধাৰাবাহিক চমকেৰে তাৰকাগৰাকী ২৪টা উইকেটৰে বিশ্বকাপৰ সৰ্বাধিক উইকেট দখলকাৰী হিচাপে পৰিগণিত হয়।

বিশ্বকাপৰ প্ৰথম চাৰিখন মেচত মূল একাদশত স্থান লাভ নকৰা ছামিয়ে এই চমৎকাৰ প্ৰত্যাৱৰ্তনেৰে ক্ৰিকেট প্ৰেমীৰ মাজত লাভ কৰিছে বিশেষ সমাদৰ তথা চৰ্চা। তাৰ মাজতে তাৰকাগৰাকীয়ে শেহতীয়াকৈ প্ৰকাশ কৰিছে ক্ৰিকেট কেৰিয়াৰৰ এক চাঞ্চল্যকৰ অতীত।

জন্মগতভাৱে মহম্মদ ছামি উত্তৰ প্ৰদেশৰ হ’লেও ঘৰুৱা ক্ৰিকেটত বংগক প্ৰতিনিধিত্ব কৰে মহম্মদ ছামিয়ে। শেহতীয়াকৈ এক সাক্ষাৎকাৰত মহম্মদ ছামিয়ে প্ৰকাশ কৰিছে ইয়াৰ আঁৰৰ ৰহস্য, কিদৰে যোগ্যতা থকাৰ পিছতো তেওঁ বঞ্চিত হৈছিল গৃহৰাজ্যৰ হৈ খেলাৰ পৰা।

ছামিয়ে উল্লেখ কৰা মতে, উত্তৰ প্ৰদেশৰ বাবে দল বাছনি পৰীক্ষাৰ সময়ত তেওঁৰ ভাতৃয়ে মুখ্য নিৰ্বাচকৰ সৈতে কথা পাতিছিল। কিন্তু মুখ্য নিৰ্বাচকৰ ভাষ্যই স্তম্ভিত কৰি তুলিছিল তেওঁলোকক। তেওঁ তাৎক্ষণিকভাৱে নাকচ কৰিছিল ছামিৰ স্থানৰ সম্ভাৱনা।

সাক্ষাৎকাৰটোত ছামিয়ে দিয়া ভাষ্য মতে, মুখ্য নিৰ্বাচকজনে ছামিৰ ভাতৃক জনাই দিছিল যে যদি তেওঁৰ পদবীৰ চকী লৰচৰ কৰিব পাৰে, তেতিয়াহে ছামি নিৰ্বাচিত হ’ব। অন্যথা নাই কোনো সুযোগ। ইয়াৰ প্ৰত্যুত্তৰত ছামিৰ ভাতৃয়ে নিৰ্বাচকৰ চকী লৰচৰ কৰা বাদেই, ঘূৰাই পেলাই দিয়াৰ শক্তি আছে বুলি মন্তব্য কৰে।

অৱশ্যে এনে শক্তি থাকিলেও সামৰ্থ্যৰ ভিত্তিত দলত স্থান পাব লাগে বুলি যুক্তি দৰ্শায় ছামিৰ ভাতৃয়ে। কিন্তু মুখ্য নিৰ্বাচকজনে সামৰ্থ্য থকা মানুহৰ তাত কোনো কাম নাই বুলিহে কটাক্ষ কৰ।লগে লগে ছামিৰ ভাতৃয়ে নিৰ্বাচনৰ বাবে পূৰণ কৰা পত্ৰ ফালি উত্তৰ প্ৰদেশ ক্ৰিকেটৰ সৈতে কেতিয়াও জড়িত নহয় বুলি শপত লয়।

এই দিনটোৱেই আছিল ছামিৰ উত্তৰ প্ৰদেশৰ ক্ৰিকেটৰ সৈতে অন্তিমটো দিন। ইয়াৰ পাছতে তেওঁ ১৪-১৫ বছৰ বয়সত কলকাতালৈ যায় আৰু প্ৰশিক্ষকৰ সৈতে মিলিত হয়। এনে বাধাৰ পিছতো ক্ৰিকেট খেলিবই লাগিব বুলি নিজ স্থিতিত অটল হৈ থকা বুলি ছামিয়ে কৰে অতীত সোঁৱৰণ।