Monkeypox: টমেট’ ফ্লুৰ মাজতে মাঙ্কিপক্সৰ আতংক; কিমান প্ৰস্তুত ভাৰত?

মাঙ্কিপক্সৰ সংক্ৰমণকলৈ সমগ্ৰ বিশ্বতে উদ্বেগ বৃদ্ধি পাইছে। আৰ্জেণ্টিনাত দুজন লোক সংক্ৰমিত হোৱাৰ খবৰ পোৱা গৈছে। মাঙ্কিপক্স প্ৰধানকৈ ইউৰোপ আৰু উত্তৰ আমেৰিকাৰ দেশসমূহলৈ বিয়পি পৰাৰ কথা জানিব পৰা গৈছে। বিশ্ব স্বাস্থ্য সংস্থাৰ মতে এতিয়ালৈকে ২০০ টা সংক্ৰমণৰ ঘটনা ঘটিছে।

এনে পৰিস্থিতিত ভাৰতীয় চিকিৎসা গৱেষণা পৰিষদে (আইচিএমআৰ) কৈছে যে সংক্ৰমণৰ বিৰুদ্ধে যুঁজিবলৈ ভাৰত সম্পূৰ্ণৰূপে প্ৰস্তুত আছে। আইচিএমআৰৰ এগৰাকী বিষয়াই কয় যে এতিয়ালৈকে ভাৰতত মাঙ্কিপক্স ধৰা পৰা নাই।

বিশ্ব স্বাস্থ্য সংস্থাৰ কোভিড-১৯ কাৰিকৰী মুৰব্বী মাৰিয়া ভান কেৰখোৱে জানিবলৈ দিছে যে আৰু অধিক নিৰীক্ষণ আৰম্ভ হ’লে মাঙ্কিপক্স সংক্ৰমণৰ অধিক ঘটনা পোহৰলৈ আহিব। অৱশ্যে, তেওঁ কয় যে এই সংক্ৰমণ প্ৰতিৰোধ কৰিব পাৰি। তেওঁ সকলো দেশকে কঠোৰ নিৰীক্ষণৰ বাবে আহ্বান জনাইছে।

বিশেষজ্ঞসকলে জনাইছে যে মাঙ্কিপক্স সংক্ৰমিত প্ৰাণীৰ কামোৰৰ পৰা সংক্ৰমণ বিয়পিব পাৰে। সংক্ৰমিত প্ৰাণীৰ তেজ, চুলি আৰু প্লাজমাৰ পৰা সংক্ৰমণ সম্ভৱ। আনকি সংক্ৰমিত জন্তুৰ মাংস সঠিকভাৱে ৰন্ধা নহ’লেও সংক্ৰমিত হোৱাৰ সম্ভাৱনা আছে। তেওঁলোকে লগতে কয় যে সংক্ৰমিত ব্যক্তিজনৰ কাপোৰ, বিচনা, টাৱেলৰ পৰাও মাঙ্কিপক্স আন ব্যক্তিৰ শৰীৰলৈও বিয়পিব পাৰে।

ইয়াৰ মাজতে ভাৰতত টমেট ফ্লু (Tomato Flu) দেখা গৈছে। কেৰালাৰ কোল্লাম জিলাত ইতিমধ্যে কমেও ৮০ টি শিশু এই জ্বৰত আক্ৰান্ত হৈছে। ই প্ৰধানকৈ শিশুৰ শৰীৰত থকা বুলি জনা যায়। আক্ৰান্ত শিশুসকলৰ প্ৰায় সকলোৰে বয়স ৫ বছৰৰ তলৰ বুলি জানিব পৰা গৈছে। ইয়াৰ পক্স, চিকুনগুনিয়াৰ দৰে ৰোগৰ লক্ষণ বা উপসৰ্গৰ সৈতে সাদৃশ্য আছে। এই ফ্লুত বিষ, জ্বৰ, ক্লান্তি আদিৰ দৰে লক্ষণ দেখা যায়।